Оьткен дуьйсемби куьн, 27-нши мартта, Дагестан Аькимбасы Сергей Меликов республикамыздынъ бас каласы Махачкаладынъ 6752-нши аьскерлик боьлигинде Баьтирлер Аллеясынынъ ашылувында ортакшылык этти.
Шатлыклы шара согыс спецоперациясы барысында оперативли аьлде оьз борышларын уйгынлы озгаратаган 102-нши айырым бригадасынынъ ян берген аьскершилер эстелигине багысланган. Эстеликти оперативли аьлде борышларын толтыратаган батальоннынъ 376-ншы боьлигининъ командири подполковник Шамиль Ахкубеков (онынъ байыр куьби Бердянскти босатувда катнаскан) эм 749-ншы боьлигининъ командири подполковник Мурадхан Ахмедханов (Энергодарда Запорожский АЭС-ти босатувды етекшилеген) аштылар. Бу офицерлер согыс спецоперациясы барысынынъ биринши куьниннен алып катнасадылар.
Регион етекшиси аьскершилерди кеспилик байрамы ман кутлады эм 102-нши бригада аьскерлик куллыгында оьз борышларын Сырт Кавказда 30 йылдан артык заман йигитше толтыратаганын белгиледи.
– Аьскершилер, командирлер бу баьри йыллар ишинде, яшавын аямай, бирерде курман этип, кескинли аьлде каты эм кеспи усталыгы ман оьз борышларын толтырганлар. Биз дайым да, тынышлыкты эм парахатлыкты коршалап, яшавларын курман эткен бизим йолдасларымызды эсте саклаякпыз. Олардынъ эстелиги – ыхтыяр йорыгын саклавшы аьлиги аьскершилерге аьскерлик тирев эм мырат. Буьгуьнде СВО озгарылатаган ерде сиз, бизим согыс йолдасларымыз, сайлаган йол – Аталыгымызга, аьскерлик борышынъызга эм берген антынъызга алаллык йолы, – деди Дагестан Аькимбасы.
Согыс спецоперациясы оьтуьв заманында 102-нши бригададынъ 400-ден артык аьскершилери оькимет савгаларына тийисли этилгенлер. Боьтен де оьзлерин коьрсеткенлер капитан Магомед Габибов, подполковник Шамиль Кябишев, ефрейтор Рустам Магомедов, капитан Иван Судаков, тамада сержант Вадим Шихов эм коьплеген баскалар.
Росгвардиядынъ Махачкаладан косылув боьлигининъ командири Дмитрий Чистяков оперативли аьлде оьз борышларын толтырувшы бригададынъ 102-нши боьлиги СВО барысында бир неше яшавшылар пунктларын нацистлерден босатканы акында хабарлады.
Баьтирлер Аллеясынынъ ашылувында коьмегин тийгисткен РФ Госдума депутаты генерал-майор Абдулхаким Гаджиев атыннан аьскершилерди кеспи байрамы ман онынъ ярдамшысы Расул Хайбулаев кутлады.
Буьгуьн Махачкалада СВО барысында оьз борышларын толтырувда янларын курман эткен ердеслеримиз, Дагестан яшавшыларынынъ эстелигине тагы да бир Баьтирлер Аллеясы ашылды. Росгвардия Управлениесининъ етекшилигининъ баславы ман «Ак-Гель» паркында 50-ге ювык яс тереклер олтыртылды.
