Оьткен юмадынъ ызындагы ис куьнинде Ногай районымыздынъ администрациясынынъ меканында Махачкала каласынынъ районлар ара табиатты коршалав прокуроры Максим Макашов пан Ногай район прокуроры Аскербий Дильманбетов биргелес йолыгыс озгарды. Олай дегенимиз, бу эки власть ваькиллери келген аьдемлерди кабыл этип, олардынъ берген соравларына яваплар бердилер.

Ызгы заманларда экология темасы бек оьткир болып турады. Боьтен де, бизди тоьгерегимиздеги кокыс бек кайгыртады. Коьплер соны маьселе деп те ойламайды эм, тербиядынъ осаллыгына япап кояды. А тербия деген не зат, кайдан басланады? Аьр бир аьдемнинъ оьзиннен деп явап берер эдим…
Келген конакка оьзининъ биринши соравын «Ногайский район» МР администрациясындагы Ямагат палатасынынъ председатели Эльмурза Союнович Саитов берди. Онынъ соравы, Ногай районымыздынъ коьбиси яшавшыларын тынышсызландыратаган, коьшпели малшылык отлакларынынъ ерлери акында эди. Бу ерлердинъ коьбиси, малдынъ саны коьпликтен, кум-такырга айланган. Сонынъ акында, Э.Саитовтынъ билдируьвине коьре, коьп ерлерге билдирилген, ама сорав ашык кепте калады, маьселе де шешилеекке усамайды.
Эльмурза Саитов тагы да, оьз соравыннан баска болып, янъыларда яшавга шыгарылган «Об использовании земель сельхозназначения» деген республикалык проект пен кызыксынды эм сол проект бизим маьселемизди шешуьвде кулланылмага болаякпа экенин сорады…
Ногай район администрациясынынъ ер тергев бойынша начальниги Алимурза Менглиязов, олардынъ ис борышларына коьре, тергейтаган ерлери араларында, документ бойынша тийисли йорык пан кулланылмайтаганларын айтып, сондай аьллерде кайтип карар алынмага кереги акында соравын берди.
Ногай районымызда экология ман байланыслы соравлар да, маьселелер де аз тувыл, солардынъ шешилуьви бизим еримизге келип кеткен, табиатты коршалавшы прокуроры ман йолыгыстан сонъ, шешилув йолына туьсеегине шекленмеймиз.
Г.Курганова.
Суьвретте: йолыгыс озган шагында.