Кизляр район администрациясында сары тамбыз айы бойынша гражданлардынъ доьрт юзден артык аьризелери каралган. Сары тамбыз айынынъ 31-нши куьнинде Кизляр район администрациясында муниципалитет аькимбасы Аким Микировтынъ етекшилиги астында гражданлардынъ кезекли кабыл этилуьви уйгынланып оьтти.

Коьбисинше, байыр ярдамлык хозяйстводы юритуьв, уьйкен эм кишкей малларынынъ отлавы, уьйшиликтеги калдыклардынъ йок этилуьви, туризм тармагында буйымларды толтырувы, яшавшыларды электроэнергия, газификация, ишерлик эм сувгарув сувы ман канагатлав бойынша соравлары каралдылар. Ер беруьв боьлиги бойынша аьризелери уьйкен белсенлик пен баскаланды. Яшавшылар тек ер эм уьй курылысы тувыл, авылхозяйстволык аьрекетин юритуьви мен де кызыксынатаганы ашык коьринди. Гражданлардан туьскен аьризелердинъ коьбисин Кизляр районынынъ аькимбасы Аким Микиров оьзи карап шыкты. Гражданлардан туьскен муниципалитет администрациясынынъ эм авыллар ыхтыярында болган соравлары ашыкландылар. Гражданларга район катнасатаган авыл ерлериндеги социаллык объектлерининъ курылысы, капиталлык ярастырувы, инфраструктуралар оьрленуьви бойынша программаларынынъ акында билдируьвлер этиледилер.
– Гражданлардынъ кабыл этилуьви яшавшыларымыз уьшин тувра адресли ярдамын этуьв болады. Мага оьткир эм тез болып шешилуьвди талаплайтаган коьплеген соравларды эм маьселелерди карамага керек болады. Аьр бир коьмек тилеген аьдемнинъ оьзине онынъ соравы энъ маьнели болып коьринеди. Баскалай болмайды. Элбетте, аьдемлердинъ тувра эм ашык хабарласувга кирисуьви бек суьйиндиреди эм тамамында олардынъ тилеги яшавларын ийги якка туьрлендиреегине сенедилер. Сондай туьрленислерде ортакшылык этуьвимди оьзимнинъ негиз борышым деп коьремен, – деди район аькимбасы.
Баска болып, аьр саьрсемби куьн гражданларды кабыл этуьвин Кизляр районынынъ аькимбасынынъ орынбасарлары эм тармаклар боьликлерининъ етекшилери озгарадылар. Гражданларды кабыл этилуьвинде яшавшылар ман бирге авыл администрацияларынынъ аькимбаслары эм район депутатлар йыйынынынъ депутатлары да ортакшылык этедилер.