Ногай район аькимбасы Джамалутдин Эсиргеповтынъ етекшилиги мен кезекли аппарат кенъеси болып оьткен.

Бу шарада солай ок район Депутатлар йыйынынынъ председатели Рустам Байманбетов, район аькимбасынынъ орынбасарлары Баймагомед Ярлыкапов пан Хамидулла Саитов, авыл администрация аькимбаслары, учреждениелер эм организациялар етекшилери катнастылар. Кенъестинъ басында Джамалутдин Эсиргепов шатлыклы аьлде Дагестан Республикасынынъ ат казанган артисткасы деген сыйлы аттынъ шайытламасы ман белгисин патшалык ногай драма театрынынъ актрисасы Гульназ Османовага тапшырды. Муннан сонъ кенъестинъ баслапкы соравы бойынша «Ногайский район» МР администрациясынынъ муниципаллык муьлки бойынша боьлигининъ начальниги Арсен Сабутов боьликтинъ быйылдынъ 7 айы ишинде юриткен куллыгы акында эсап берди. Докладшы боьликтинъ специалистлери аьрекет этип турган законодательство ман келисли кепте ер участокларын тийисли йорыкларга келтируьв соравлары бойынша гражданларды эм юридический лицоларды кабыл этетаганы акында айтып белгиледи. Эсап беруьв заман кезегинде ер катнасувларынынъ соравлары бойынша аьдемлерге 350 консультациялар берилген. Арсен Сабутовтынъ айтувы ман, физический эм юридический лицолардынъ берген аьризелерине коьре, РФ Ер кодексининъ нормалары ман келисли аьлде аьзир этилинген: – байырлыкка ер участокларын беруьв акында 7 токтаслар. Соларга коьре ортак майданы 4 412 квадрат метр оьлшемли (авыл ерлериннен) сатув-алув акында келисуьвлер туьзилген; – территориядынъ кадастр планында ер участокларынынъ орынласув схемаларын беркитуьв акында 28 токтаслар кабыл этилинген; – 276 ер участоклары туьзилип кадастр эсабына салынган эм авыл поселениелерининъ байырлыгына алдынгы заманларда авыл администрациялары ман шыгарылган эм турак уьйлери эм курылыслары бар болган ер участокларын физический лицолардынъ байырлыгы эсабында регистрациялав ниет пен берилген; – коьп балалы 7 аьеллерге ер участокларын беруьв уьшин олар эсапка алынганлар. Муниципаллык муьлки бойынша боьликтинъ етекшиси солай ок иесиз деп саналатаган муьлкалаттынъ акында да хабарлады. «Боьлигимиз соны ман бирге районда иесиз яткан муьлк-алатты табув бойынша да айырым куллык юритеди. Соьйтип, 2022-нши йылда 6 комплексли иесиз трансформаторлар барлыгы белгиленген. Аьлиги заманда табылган иесиз электро эм газ тармакларын кадастр эсабына салув бойынша шаралар оьткериледи, сонынъ барысында ДР бойынша Росреестр управлениесине 108 аьризелер берилген. Берилген аьризелердинъ сырагысында кадастр эсабына иесиз болып яткан 49,7 шакырым электролиниялары, 91 трансформаторлар эм 19,1 шакырым газ тармаклары алынганлар», – деди Арсен Сабутов. Кенъесте район аькимбасы Джамалутдин Эсиргепов келеяткан йылдан алып авыл ерлерин оьрлентуьв программасы бойынша район орталыгы – ТереклиМектеб авылына хыйлы акша карыжлары йиберилмеге болатаганы акында айтты. Онынъ соьзине коьре, республикадынъ Авыл хозяйство эм тамак-азык министерствосы эндигиден армаган солай ок авыллардагы йоллар, артезианлар, орамларды ярыклатув, ярастырув эм курылыс ислери бойынша карыжлар йибереек. Муниципалитеттинъ етекшиси: «Эгер алдынгы йылларда биз орам йолларына тек гравий тасын тоьгетаган болган болсак, эндигиси соларга асфальт тоьсевге кирисемиз», – деп билдирди. Быйыл район орталыгында 3 орамга асфальт тоьселеек. Районнынъ социалэкономикалык оьрленуьвининъ келеектеги планлары акында айта келип, район етекшиси Терекли-Мектеб эм баска авылларда стадионлар, район еринде индустриаллык паркы курылаягы эм оьзге социаллык маьнелиги болган билдируьвлер акында хабарлады. Биз районымыздынъ коьп маьселелерин тек алдыга, келеектегиге карап шешпеге болаякпыз деп белгиледи ол. Сонынъ уьшин бизге яшавга карасымызды туьрлендирмеге, тек бирбиримизди колтыклап тувган районымызды оьрлентуьвде коьп хайыр этпеге болаягымызды тереннен анълав керегеди. Район орталыгындагы йоллардагы яявлар оьтетаган ерлерди тийисли кепке келтируьв акында Баймагомед Ярлыкапов билдируьв этти. «Бу борышка уьйкен маьне бермеге керегеди. Ол Россия Президентининъ тапшырмасы», – деди район аькимбасынынъ орынбасары. Кенъестинъ тамамында патшалык ногай драма театрынынъ етекшиси Байсолтан Джумакаев быйыл июнь айында миллет театры Крымда оьткен халклар ара театр фестивалинде уьстинликли катнасканы акында хабарлады. Онынъ айтувы ман, театр коллективи тагы да 20-ншы сентябрьде Симферопольге бармага ниетленеди. Ол район администрация етекшилерине театрга Крымга бармага ярдам эткени уьшин уьйкен разылыгын билдирди. бизим хабаршы. Суьвретте: «Ногайский район» МР аькимбасы Д.Эсиргепов эм Г.Османова.