25-нши курал айында ДР Энергетика эм ЖКХ министерствосынынъ ваькиллери сонынъ министрининъ орынбасары Эфенди Хайдаковтынъ басшылыгы ман Ногай районында конакта болдылар.

Йолыгыстынъ барысында муниципалитеттинъ микрорайонларында эм авылларында электричество, газификация, сув ман канагатланув соравлары ойласылган.
Ногай районынынъ авыл ерлерининъ инфраструктурасы модернизациялавды талаплайды эм министерство ваькиллери оьз кезуьви мен муниципалитеттинъ маьселелерин иркуьвсиз куьн сайынлык ис аьрекети уьстинде шешпеге аьзир экенин билдиргенлер. Соны ман байланыста, Эфенди Хайдаковтынъ айтувы ман, быйыл ок объектлердинъ бир нешевлери модернизациялав программасына киргистилеек.

Йолыгыста солай ок район еринде артезианлар казувды эм кокыс маьселесин шешуьвди тийисли йорыкка келтируьв соравы да ойласылды. Кокыс йыюв бойынша уполномоченный операторлар былтыр республика эм сонынъ санында Ногай районы еринде оьз ис борышларын толтырмаганлары белгиленген.
Кенъестинъ ызында делегация гражданларды кабыл эткен эм Терекли-Мектеб авылдынъ микрорайонларынынъ бирисининъ ваькиллерининъ тилегин ойласып карамага деп алган. Сол микрорайонынынъ яшавшылары ЖКХ коммуникациялары эм сув ман канагатланув бойынша кыйынлык коьредилер. Оларды эс берип тынълаган сонъ, Эфенди Хайдаков гражданлар тилегин эсапка алган эм сол маьселелерди шешпеге соьз берген.
«Йолыгыста коьтерилген баьри соравлар да республика етекшисине еткерилеек», – деп сендирген Эфенди Хайдаков.