Уьстимиздеги йылдынъ навруз айынынъ 31-нши куьнинде Дагестан Республикасынынъ Аькимбасы Халк Йыйынынынъ алдында республикадынъ социал-экономикалык оьрленуьви уьстинде эсап берген заманда, Дагестаннынъ сырт зонасындагы ерлердинъ кум-такырга айланув соравын коьтерди.

– Ерлердинъ кум-такырга айланув маьселеси тек бизим республикамызда тувыл, савлай элимиз бойынша да сондай маьселеси бар ерлер аз тувыл, неге десе бу тармакка коьп йыллар тийисли эс этилинмеген. Биз бу маьселеди Россия Федерациясынынъ Президенти Владимир Владимирович Путиннинъ алдында да коьтергенмиз. Боьтен де, республикадынъ сырт зонасында мелиорацияды оьрлендируьвди тилегенмиз, – деди Сергей Меликов.
Солай ок, Сергей Меликов 2021-нши йылда программалык шараларды яшавга шыгарув ишинде 3,8 мынъ гектар ерлерде гидромелиоративли шаралар оьткерилгени кизляр отлакларында 5 гектар ерде кумды токтатар ниет пен фитомелиоративли шаралар озгарылганы акында айтты. Оннан баскалай да, аз куллыклар этилмедилер. Сонынъ уьшин Сергей Меликов Дагестан Республикасынынъ авыл хозяйство министрине разылыгын билдирди эм бу ислер тергев астында туратаганын да айтып кетти.
Йыйыннынъ барысында ДР Аькимбасы Сергей Меликов, оькинишке, кизляр отлаклары кум-такырга айланувын токтатып болмайтаганын белгиледи, болса да, бу маьнели маьселе Федерация Совети, Россия Федерациясынынъ авылхозяйстволык министерствосы алдында коьтерилип, биргелес куллыклар этилетаганын айтып озды.
Сергей Меликовтынъ ер мен байланыслы болып коьтерген соравын «Ногайский район» МР администрациясынынъ аькимбасы Мухтарбий Аджеков бардырады.
– Дагестан Республикасынынъ Аькимбасы Сергей Меликовтынъ кизляр отлакларында экологиялык аьллер айлак осал деп белгилеви акыйкат. Бу ерлерде аьллер ийгилерден тувыл. Ногай ра- йонымыздынъ коьшимли малшылык отлакларында аьллер осал эди, буьгуьнлерде айлак та осал болган.
Дагестан Республикасынынъ авылхозяйстволык министерствосынынъ билдируьвлерине коьре, кизляр отлакларында, коьшимли малшылык отлакларында 150 мынъ гектар ашык кумлар эм 300 мынъ гектар деградацияланган отлаклар бар. Сол бизди айлак кайгыртады.
Аьли уьшин республикадынъ авылхозяйстволык министерствосы маьселе уьстинде ислейди, ама этилинетаган куллыклар маьселеди шешпейди. Сонынъ уьшин аьрекетти аьли де куьшейтпеге керек.
Бу маьселеди Дагестан Республикасынынъ Аькимбасы Сергей Меликов федераллык дережесинде бир неше кере коьтерген, сонынъ уьшин биз уьйкен йигерлик пен маьселе тез арада шешилеегине бек сенемиз.
Регион етекшиси белгилеп кеткенлей, ердинъ кум-такырга айланув маьселеси тек сырт Дагестанда тувыл, Россия Федерациясы бойынша ети регионда бар. Соны ман байланыслы болып, ердинъ кум-такырга айланув маьселеси мен куьрес юритуьв орталыгы Волгоград каласында да бар. Бу орталык маьселеди терениннен тергейди. Тез арада аьлимлер федераллык орталыгына оьз ойларын билдиреегине сеним тувады.
Ерлердинъ кум-такырга айланув маьселеси ериннен де козгалмаяк эди, эгер былтыр Дагестан Республикасынынъ Аькимбасы Федерация Советининъ алдында бу соравды коьтермеген болса. Мен Ногай район яшавшылары атыннан Сергей Меликовка сонынъ уьшин оьз разылыгымды билдиремен. Онынъ эм оьзимиздинъ куьшимиз бен бар маьселеди шешеегимизге бек сенемен, – деп явабын берди «Ногайский район» МР администрациясынынъ аькимбасы Мухтарбий Аджеков «Шоьл тавысы» республикалык газетасынынъ хабаршысына.