Бизим редакцияга ким де кайдай сорав ман да келедилер. Биревлер билген, эситкен хабары ман боьлиседилер, баскалары ювык-кардашларына кутлавлар бермеге суьедилер, уьшиншилер кайгырганларга бассавлык йорайдылар. Соьйтип, янъыларда бизге Нариман авыл яшавшысы, уста коллы окытувшы, ясуьйкенимиз Нурманбет Тангатар увылы Зарманбетов келди. Аясында – медаль.

– Бизим мектебтинъ касында тасланган эски контора бар. Онда ким де юреди, эсиги йок, терезелери бузылган. Мен мунда не бар экен деп кызыксынып, бир куьн меканнынъ экинши шарлагына коьтерилдим. Иши кокыска толганын, кир болаятырганын, тамларына савлай язганларын, ягарлык трубалар савлай сындырылганын коьрип, юрегим авырыды. Мен муьйистеги ягарлык труба козгалганын коьрип, сол ерде кишкей актарынып басладым. Муьйистинъ полынынъ такталарынынъ биреви ашылыпты, колымды йиберип, излеп басладым, белки, бир зат бар болгандыр бу ерде деп. Колыма темир уьшкил бир зат ийнедей болып кадалды. Шыгарып алсам, афган медали экен. Шанъын сыпырып, тазалап алып, уьйге аькеттим.

Авылда хабар эттим, болса да бирев де табылмады. Аьлиги заманга дейим де иесин тавып болмайман. Сога коьре, редакцияга келип, билдируьв этпеге токтастым, сол медальди тапканыма бир йыл болды. Белки, газетады окып, медальдинъ иеси келер. Эгер табылмаса, медальди музейиме салып коярман.
Мага 89288662137 телефон номери бойынша тел сокпага боласыз, – деп оьз хабарын айтты окытувшы.
Эгер сиз бу билдируьв бойынша билетаган затынъыз бар болса, медальди тапкан аьдемге тел сокпага боласыз. Эс этинъиз деп баьринъизге де тилек саламыз.

Э.Кожаева,
«Шоьл тавысы» республикалык газетасынынъ бас редакторы.
Суьвретте: йойылган афган медали.