Альберт Батыргазиевтинъ атасы увылын кайтип чемпион этип тербиялаганы акында хабарлаган

Альберт Дагестанда коьп балалы аьелде тувган. Келеектеги чемпион 6 ясында заманда аьели Нижневартовск каласына коьшеди. Кедединъ атасы Россия МЧС-на куткарувшы болып куллыкка туьседи, соннан 2015-нши йылда пенсияга кетеди.
– Ханбулат Гаджибуллатович, телевизор карадынъызба?
– Аьши, биз сав аьелимиз бен экраннан айырылмай карадык. Янымыз бек авырыды.
– Альберт спорттынъ бу кебине кайтип келген?
– Алты ясыннан алып ети ясына дейим ол оьзининъ уьйкен агасы Рамазан ман бирге каратэ секциясына юрген. Сонъында мен Альбертке кызыл боксер колгапларын эм боксер «кертпесин» савга этип бердим. Ол оьзин бокс секциясына аькетши деп мага тиледи. Тек бизим ювыгымызда сол заман кикбоксинг секциясы бар эди, балады каладынъ аргы шетине дейим элтемеге аьдем табылмады. 2013-нши йылда Альберт 18 ясына дейим кикбоксинг бойынша яслардынъ Европа чемпионатында алтын медальди алды. Оннан сонъ ол ызлы-ызыннан эки кере дуныя чемпионатларында да енъуьвши болды. 2017-нши йылда увылым Россия чемпионатында катнасып, сонда да алтын медальди казанды. Кикбоксинг ога ярайтаган эди, ама ол бокс акында, боьтен де Олимпиада ойынлары акында мырат этип турды. Сонынъ уьшин Альберт 18 ясында кикбоксингти койып, бокс бойынша турнирлерде катнасып баслады.
– Увылынъыздынъ Олимпиада сырагылары акында эситкенде, сизди кайдай сезимлер бийледи?
– Суьйиндик. Увылымыз аьруьв сырагыларга етисти.
– Альберт Олимпиадада ярым финалдан сонъ оьзине куьмис медальди казанган демеге болады. Сизге увылынъыз соннан кайдай медаль аькелееги маьнели ме?
– Биз уьшин кедемиз аьли ок Олимпиада чемпионы, ама биз соннан ол тек алтын медаль аькелер деп сенемиз. Медаль уьшин ерди аьли эртерек аьзирлегенмиз эм Альберттинъ уьйге кайтканын куьтемиз.
Боксер оьзи атасынынъ ис кесписи мен оьктемсийди, сонынъ акында ол хабарласувымызда бир неше кере эскерди. Йырма уьш ясындагы Альберт Батыргазиев уьшин бу онынъ биринши Олимпиадасы.