Савлай дуныядагыдай болып, Россияда эм бизим республикамызда коронавирус пан байланыслы аьллер куьн сайын туьрленип турады. Буьгуьнлерде Дагестан Республикасынынъ Савлык саклав министерствосынынъ куьшлери мен авырувга карсы турувга аьзирлик коьриледи, баьри муниципалитетлерде баьри амаллар да алынып туры.

Тарумов районынынъ Новодмитриевка авылынынъ орта мектебининъ директоры Гульмира Алимпаша кызы Манапова (суьвретте) бизим газетамыздынъ корреспондентине ол етекшилейтаган билимлендируьв учреждениесинде коронавируслы инфекциясы ман байланыслы аьллери акында хабарлады.
– Бизим мектебте 48 аьдем ислейди, вакцинацияды коллективимиз 100 процентке оьтти. Аьр бир окытувшы тек оьзининъ кавыфсызлыгын ойламай, окувшылардынъ ден савлыгы акында ойлаганлар. Ис бойынша бизге ата-аналар ман катыспага туьседи. Буьгуьнлерде окытувшылардынъ, окувшылардынъ арасыннан бирев де авырмаган, мектеб штат бойынша ислейди.
Вакцинация этуьвимиз аьлиги заманда бизге парахат ислемеге амал береди, неге десе биз балаларга берк билим бермеге керекпиз. Окувшылар арасында грипп пан авырганлар бар, сол зат бизди тынышсызландырмай болмайды. Сога коьре баьримизге де сезгир эм яваплы болмага керек.
Кайбиримиз вакцинация оьтип, баскаларды да шакырмага керекпиз. Аьдемлер оьледилер, аьеллер больницаларда ятыр, вирус бизим яшавымызга кирген. Оны токтатув уьшин бизге вакцинация оьтпеге керек. Маразды биргелесип токтатайык деген шакырув этемен баьрисине де. Сол заман авырув да кетер, мектеблеримиз де парахат ислер, – деп айтады мектеб етекшиси.