Шелковской районындагы Воскресеновский авылында эки шарлаклы мектеб бар. Сол мектебтинъ меканы 1980-нши йылда салынган. Мектебте ногай тили кайбир себеплерден окытылмайтаган болган.

Балаларга ногай тилиннен дерислери биринши эм экинши классларда берилип баслаганына мине эки йыл болады. Сол зат аьр кайсымызга да ийги туьрленис эм аьруьв хабар болады. Баслангыш класс окувшыларына ана тилиннен деристи Джавгарат Кошалиевна Амангельдиева юритеди. Ол коьп йыллардан бери баслангыш класслардынъ окытувшысы куллыгын юритип келеди. Онынъ айтувы ман, ана тилин окытувда кулланатаган эки туьрли элиппелери бар, соьзликти ол оьзи сатып алган. Элиппеди Каршыга авылыннан ярдам этип йибергенлер. Сол зат куллык этпеге онъайлыкты туьзеди. Окытувшы Джавгарат Амангельдиевадынъ белгилевине коьре, окувшылардынъ арасында ана тилиннен билимлери мен Ясмина Акбердиева ийги деп белгиленеди. Ол ана тилин бек суьйип окыйды.
Соьйтип, Воскресеновское авыл мектебинде ийги туьрленис болып туры. Сол зат оьктемлик, патриот сезимлерин оьстируьвде, бай ногай тили мен танысувда уьйкен себеплик этеегине соьз йок.
Келеекте мектеб окувшыларына эм олардынъ ата-аналарына ана тилин уьйренуьвде уьйкен уьстинликлер йорайман.
Я.Дильманбетова.
Суьвретте: Я.Акбердиева.