Выпускниклер кешлиги – ол аьр аьдем яшавында тек маьнели тувыл, эсте сакланатаган энъ ярасык оьзгерис. Ол яшавда бир кере болады. Аьр окувшы сол куьнди кайдай ды бир юрек телезуьви мен эм уьйкенлер яшавына коьшуьвди сезуьви мен куьтеди. Ол – бала яшавында келеектегиге абыт алувга себеплик этетаган энъ ызгы басамак, савлай яшав бойы аьримиз саклайтаган балалык эскеруьвлеримиздинъ ызгы анъ белгиси. Алдыда – уьйкенлер алдында туватаган кыйынлыклар: йогары яде специальлик окув ошакларына туьсуьв, военкоматтынъ аьскер сырасына шакырувшы пункты, куллык излестируьв. А артта болса, биринши суьйим, суслы, ама дурыслыкты суьетаган окытувшылар, алал тенъ-дослар эм завыклы мектеб дискотекалар. Мине бу баьриси мен де айырылыспага туьсеек бу выпускниклер кешлигинде.
Сондай шатлыклы кешлик оьтти янъыларда С.И.Капаев атындагы Калининаул мектебинде выпускниклердинъ, олардынъ окытувшыларынынъ эм ата-аналарынынъ катнасувы ман.
Мектеб етекшиси Эльмира Айнадиновна Аджекова бу шатлыклы оьзгерисли куьни мен байланыста баьри йыйылганларга оьзининъ кутлав соьзлерин каратты, выпускниклер Абдулкерим Искаковка эм Диана Кульниязовага алтын медальлер тапшырды.
Белгилев керек, быйыл бу ерли мектебти доьрт окувшы окып битирди. Мектеб оьктемлиги, ата-аналардынъ суьйиниши – Россия, регион эм ерли оьлшеминде туьрли окув сабаклары бойынша оьтетаган ярысларда, олимпиадаларда катнасып, енъуьвши орынларга тийисли болган выпускниклер.
Коьп алгыслав соьзлер эм ийги йоравлар эситилди бу мектеб байрамында. «Дуныяда энъ де уьйкен куьез – балалар. Оларды эл мактаса, оннан артык не керек», – деди йыйылганлар арасыннан нур тоьгилген юзли эм караслы бир ясуьйкен кыскаяклы.
Кешлик сонъында мектеб завучы, математика окув сабагынынъ окытувшысы, педагогикалык исининъ устасы Нарбике Ашимовна Джумагельдиева, ата-аналар атыннан Джамиля Бегалиевна Искакова выпускниклерди кутладылар эм оьз йоравларын айттылар. «Алдыга салынган мыратларынъыз яшавга шыгарылсын. Суьйген кеспилер иелери болып, ногай халкынынъ атын айттырып, данъкын арттыраягына сенемиз», – деген соьзлер мен тамамлады выпускниклер кешлигин мектеб етекшиси Э.Аджекова.
С.Янгазиева,
ерли мектеб окытувшысы.
Суьвретте: выпускниклер кешлигинде.
