Салимет Исрапил кызы Абдулкадырова Ногай районынынъ Бораншы авыл мектебинде 1979-ншы йылдан алып куллык этеди. Ол Хасавюрт педучилищесин окып кутарган сонъ Дагестан патшалык пединститутынынъ баслангыш классларынынъ факультетин битирген.
Басында ол пионервожатый, мектебтинъ комсомол организациясынынъ секретари, профкомынынъ председатели болып ислеген. 2008-нши йылда Салимет Абдулкадырова «Йыл окытувшысы – 2008» район конкурсында катнасып, 3-нши баргылы орынды казанган.
2014-нши йылдынъ 15-18-нши декабрь куьнлеринде окытувшы VI Гуманный педагогика бойынша Кавказ педагогикалык окув шарасында, сонъ 2015-нши йылда сондай Гуманный педагогика бойынша Буйнакскта оьткен XI Республикалык VII кала педагогикалык окувларында ортакшылык эткен.
Салимет Исрапиловнадынъ окувшылары йыл сайын район эм республикалык конкурсларында белсенли катнасып, баргылы орынларды аладылар.
Салимет Абдулкадырова оьзи де ийги иси эм усталыгы уьшин Ногай район администрациясынынъ аькимбасы, район билимлендируьв куллыкшыларынынъ профсоюз комитети атыннан бир неше кере Сый грамоталары ман савгаланган. Ол быйыл мектебте 43-нши окув йылын баслаган. Сол шаклы йыллар ишинде мектебтен 10 кере оьз выпускниклерин яшав йолына озгарган. Быйыл онынъ бир окувшысы Айгуль Менглиязова мектебти алтын медаль мен окып кутарды. Оны ман бирге мектебти 4 эм 5 белгилерге выпускниклер Вазир Махмузов, Амина Мансурова, Камила Урцумиева да окып битиргенлер.
Билимли эм сулыплы окытувшы 2020-ншы йылда тувган тил окытувшыларынынъ район семинарында ортакшылап, «Тувган ерим – еннет, сувы – сербет» деген ашык дерисин берген. Ол оьз дерислеринде балаларда ана тилин уьйренуьвге уьйкен маьне береди. Окувшыларында тувган ерине, халкына, тилине суьйимликти тербиялайды. Оьз ис аьрекетинде мектеб бойынша коьп кызыклы эм ийги терен маьнели класстан тыскы шаралар да оьткереди. Салимет Исрапиловна коьпйыллык етимисли куллык этуьви уьшин «Дагестан Республикасынынъ халк билимлендируьв отличниги» деген коькирек белгиси мен савгаланган. Онынъ акында мектеб директоры Бектемир Зарболганов: «Оьз куллыгы, дерислери, шаралары уьшин бек яваплы, тапкыр, оьнерли окытувшы. Аьр заман да ата-аналар ман тар катнаста куллык этеди.
Оьзининъ суьйикли окытувшысы акында Бораншы авыл мектебининъ 4-нши классынынъ окувшысы Амина Толубаева аьли де 2003-нши йылда «Меним биринши окытувшым» деген сочинениесинде булай деп язган: «Ол мага эртегилерде йолыгатаган аьйлекерли ислерди этип бажаратаган хатынга усайтаган эди, неге десе онынъ авызыннан мен эректеги эллер, туьрли йылгалар эм океанлар акында билгенмен. Окувдынъ биринши куьниннен ок мен оьзимнинъ биринши окытувшымды суьйгенмен эм мен ол дайым да меним эсимде эм юрегимде калар деп берк сенемен, неге десе ондай аьдемди суьймей эм эскермей коймага болмайсынъ!», – деп язган.
Район окытувшыларынынъ кезекли бир семинарында Карагас авыл орта мектебининъ тувган тил эм адабиат окытувшысы Нурсият Зарманбетова Салимет Абдулкадыровады «мектебтинъ Суьйимбийкеси» деп атаган.
М.Ханов.
Суьвретте: Салимет Абдулкадырова.
