Прокуратура куллыкшыларына – Мен, балам он сегиз ясына толганша, оны саклар уьшин, алименты тоьлегенмен, ол окыган заманда, мен онынъ окувы уьшин акша тоьлемеге керекпен ме? – деген сорав туьседи. Баланъыз он сегиз ясына толганнан сонъ, оны алименты тоьлеп, канагатлав, сизинъ борышынъыздан таяды.

Атасы ман анасы айырылыскан аьелде бала бар болса, оны канагатлав уьшин атасы яде анасы (бала ким мен яшаса, сога), алименты тоьлемеге борышлы болады, сонынъ акында 2017-нши йылдынъ карагыс айынынъ 26-ншы куьнинде кабыл этилинген 56-ншы номерли токтасы ман Россия Федерациясынынъ Оьр судынынъ Пленумы тувра беркиткен. Эгер алименты алар уьшин аьризе язылган шакта бала он сегиз ясларында болса, онынъ аьризеси алынмай коймага да болады.
Аьлиги заманларда аьрекет этетаган аьел законодательствосына коьре, эгер аьелде ясы етпеген яде ясы еткен, ама ден савлыгында кемшилиги болып, коьп шыктаж этилинетаган болса, атасы яде анасы (бала оны ман яшамайтаган болса), суд аркалы, аьллерге коьре, шыктажды толыстырмага яваплылыкка тартылады.
Биз йогарыда келтирген Россия Федерациясынынъ Оьр судынынъ Пленумынынъ токтасы ман келисте, сонынъ 38-нши пунктына коьре, ясы еткен, ама сакат аьдем оьзи де, ата-анасына карамай (олардынъ биревиннен алименты алмага болады), онынъ шыктажын толыстырмага, аьризе язбага болады.
Бу ерде белгилеп озбага керек болады, дени сав болган, оьзлери де негизли билимлендируьв программалар бойынша окувларын бардыратаган болса, оларга алименты тийисли тувыл.