Оьз элининъ, халкынынъ аьвелгисине сый этуьв ниет пен яс несилде патриотизм тербиялавын куьшлетуьв уьшин увыт айынынъ 14-нши куьниннен алып курал айынынъ 9-ншы куьнине дейим «Бизим тарих» деп аталып, яслар проектлерининъ Савлайроссиялык конкурсы озды. Аьлиги заманда бизим баьтирлик тарихимизди туьрлендирмеге суьетаганлар коьп болды, оьсип турган несил оьз элининъ баьтирлерин билмеге керек деген ой ман озгарылады бу конкурс. Быйылгы конкурстынъ бас темасы – «1812-нши йылдагы Аталык согысында орыс аьскерлердинъ енъуьвине – 210 йыл». Шарады уйгынлавшылар – «Келеектегидинъ стратегиясы» билимлендируьв проектлерди коьтергишлев фонды эм Россия Федерациясынынъ Государстволык Думасынынъ Федераллык йыйыны.
Конкурстынъ финалы Москва каласында курал айынынъ 7-9-ншы куьнлеринде озды. Финалга 6000 проектлерден тек 600 ислер сайланган. Аьр бир катнасувшы оьз исин коршалаган. Дагестан Республикасын Ногай районынынъ Терекли-Мектеб авылыннан «суьврет» номинациясы бойынша Аделина Курманбаева эм Султан Суюндиков, «эссе» номинациясы бойынша Азиза Бекмуратова («Согыслар дуныя тарихинде») коьрсеттилер. Айырым бу саьбийлерди аьзирлеген А.Джанибеков атындагы окытувшы Гульнара Солтахан кызы Хозбулатовады белгилев керек. Ол шынты окытувшылардынъ бириси деп саналады.
Аделина Курманбаева коьрсетилген номинация бойынша II орынды алды, Азиза Бекмуратова оьз номинациясында конкурстынъ енъуьвшиси болды.Енъуьвшилерге электрон MyBook китапханасыннан эм «Лео» брендтан, солай ок уйгынлавшылардан балалар яратувшылыгы уьшин баргылар тапшырылды. «Эссе» номинациясы бойынша конкурс катнасувшыларын жюри агзасы, музыкант, дирижер, ямагат аьрекетшиси, савлайроссиялык эм халклар ара конкурслардынъ лауреаты Алексей Пугачев тергеди эм олардынъ ислерине баа берди. Ол Азиза Бекмуратовадынъ исин де белгиледи. Онынъ айтувы ман, кызалак оьз исин йогары дережеде коршалады, экспертлерге оьз ойларын еткерип болды. Онынъ хабарын тынълаганда, анълайсынъ, кайтип автор юреги мен оьткереди сол йыллардынъ баьтирлигин, кыйынлыгын.
Енъуьвшилерге баалы баргылар тапшырылды.
Г.Абдулакимова.
Суьвретте: конкурс катнасувшылары.
