Мага бу йылдынъ 28-нши март куьнинде Дагестан Республикасынынъ Аькимбасы Сергей Меликовтынъ 63-нши номерли Указы бойынша Дагестан Республикасынынъ Халк поэти деген йогары ат берилди. Сол куьннен алып мине аьлиге дейим де ногайлардан эм баскалай миллетлерден мага онлаган тел согувлар, кутлавлар келедилер эм оьзгелей йосыкта сый-оьрмет этилинеди. Ол меним уьшин уьйкен сеним, яваплылык, куьез эм оьктемлик.

27-нши июньде Махачкаладагы Алимпаша Салаватов атындагы патшалык кумык музыка-драма театрында халк коьлеми йыйылып, меним яратувшылык кешлигим озды. Онда аьдемлер Москвадан, Москва областиннен, Ставрополь крайыннан, Карашай-Шеркеш ериннен, Астрахань областиннен, Шешен Республикасыннан, солай ок Сургут каласыннан эм Ямало-Ненец автоном округыннан, оьзек те, Дагестаннынъ Ногай эм баскалай районларыннан эм Махачкаладан да келдилер эм мени сыйлайтаганларын коьрсеттилер. Кешликти ДР Маданият министерствосы, Дагестаннынъ Язувшылар союзы эм Ногай район администрациясы уйгынладылар. Кешликке келген аьр бир аьдемге эм оны уйгынлаганларга эм меним акымда шыгып оьз ойларын айтканларга эм кешликте ортакшылык эткен баьри де маданият ваькиллерине ак юрегимнен терен разылыгымды билдиремен эм сенемен: сондай сый-оьрметти ямагат миллетимиздинъ баска тийисли ваькиллерине де этерлер деп.
Йылы саламы ман:
А-Б.Култаев,
Махачкала.