«Дагестан Республикасынынъ ат казанган маданият куллыкшысы», «Дагестан Республикасынынъ Халк артисти» деген сыйлы атлардынъ иеси Ногай патшалык театрынынъ талаплы артистлерининъ бириси – Оразбийке Тангатаровна Кокоева бу куьнлерде коронавируслы маразына карсы вакцинадынъ эки кезегин де оьтип, оьз ден савлыгын сакладым деген сезим мен аьрекетин бардырады.

– Бек авыр заманда яшав аьллеримизди оьтемиз, биз сондай ис орында ислеймиз, аьрекетимиз аьдемлер мен байланыслы. Эгер биз авырувды алып юруьвши болсак, тоьгеректегилеримизге де кавыфлык тувдырамыз. Сога коьре, сакланмага эм сакламага – бизим борышымыз. А мен анълап, бу зарарлы мараздан тек вакцина сакламага болады. Мага кызым да вакцинадынъ пайдасы болмаса, зарары болмаягы акында аьруьв этип анълатув этти. Соьйтип, биз оьз етекшимиз Байсолтан Атагиши увылы Джумакаев, Салимет Ханмурзаева эм мен, ямагатка кавыфлык тувдырмас ниет пен эм оьз савлыгымыз акында ойлап, коронавируслы маразга карсы вакцинады алдык. Аьли эки кезегин де оьткенмиз. Савлыгымыз яман тувыл, мен биринши кезегин алганда, кейфим бираз тоьменленген эди – этим кызды, суьеклериме авырлык туьскендей болды, ама сол аьл де коьпке созылмады, бир-эки куьннен коьмилген ийнединъ ызы да калмаган эди. Экинши кезегин эткенин де сезбедим. Бек енъил оьтти, – дейди Оразбийке Кокоева.