Янъыларда «Ак шобан» деген Ногай районынынъ Бораншы авыл маданият уьйининъ биюв коллективи (художестволык етекшиси Альфия Боршакаева) Черкесск каласында оьткен «Маьметекей» республикалык адабиат-художестволык балалар уьшин журналынынъ 20 йыллык мерекесин белгилев кешлигинде ортакшылык этти.

Саьбийлер мен кешликке баслангыш классларынынъ окытувшысы С.Абдулкадырова, окытувшы М.Эльмурзаев те бардылар. Окувшылардынъ мерекели кешлигине барув йолына авыл яшавшысы Умархан Озганбаев карыж ягыннан демевлигин этти.
Биюв коллективи шарада «Домбыра» деген биювин оьнерли бийип коьрсетти эм Динара Картакаева «Тувган ерим» деген ана тилинде йырын усташа йырлап эситтирди.
Соьйтип, «Ак шобан» биюв коллективининъ Ногай районынынъ тысына биринши кере шыгувы йогары коьнъилде эм етимисли озды.
Н.Халилова.
Суьвретте: шарадан коьринис.