Оьткен уллы юма куьн Дагестан Аькимбасы Сергей Меликов Миллетлер ара байланыслар бойынша советининъ Пятигорск каласында озгарылган кенъесинде ортакшылык этти. Кенъести Россия Президенти Владимир Путин озгарды.
Кенъес катнасувшылары патшалык миллет политикасынынъ аьлиги россиялык кебининъ илгериликлери, аьдем аьрекети мен туьзилетаган эм туьрленетаган маданият-социаллык аьллерде янъы регионлардынъ бирлесуьви эм тыскы кавыфсызлыклар орын тапкан аьллерде патшалык миллет политикасынынъ Стратегиясына туьрленислер киритуьв мен байланыста соравлар ортага салып ойластылар.
– Биз Россияга, баьри бизим ямагатка карсы тыс яклардан аьли кайдай кавыфлык тувдырылатаганын коьремиз. Бизге карсы аьли баьри арсенал – экономикалык, аьскерлик, политикалык, информациялык амаллар йиберилген. Куьш-куватлы антироссиялык пропаганда аьрекети кенъ яйылдырылган.
Бизим тарихке, маданиятка, анъ-акыл баалыкларга шапкынлык этуьв токтатылмайды, – деди Владимир Путин, Совет кенъесининъ куллыгы акында айта берип.
В.Путин солай ок бизим элимизди куьшли эм енъилместей этетаган тек бирлик экенин белгиледи. «Соны ман байланыслы бизим бар болганымыз. Оны баьри де акылы ман да, яны ман да, юреги мен де сезедилер эм анълайдылар. Сонынъ уьшин аьлиги аьллерде бизим ямагатымыздынъ биргелеспеге кереклиги, соьзсиз де, аян», – деп белгиледи президент.
– Ямагат арасында бир-бирисине сенимлик этуьв эм коьмеклесуьв артып барады. Бизим тыпакласувымыз берк эм сенимли, Аталыкка катыслыгымыз тереннен-терен болды.Тыс яклардан бизге карсы этилинетаган аьрекетликлер орын тапкан аьллерде бизим коьпмиллетли халкымыз бирлесе береди. Аьдемлердинъ коьплери, оьзлерин бас деп элимиздинъ гражданлары эсабында санайдылар, оьзлерин айырым этнокуьп сырасында тувыл, россия ямагатына, бизим оькиметимизге карыслыгы барын биринши орынга саладылар», – деп белгиледи Элимиздинъ етекшиси.