Россия Федерациясынынъ маданият министерствосынынъ, Поленов атындагы Россиядынъ патшалык халк яратувшылык уьйининъ, «Дагестан» патшалык телерадиокомпанияларынынъ колтыклавы ман 2003-нши йылдан алып, Дагестан Республикасынынъ маданият министерствосы ман республикалык халк яратувшылык уьйи «Радуга» атлы яратувшылык шарасын озгарадылар.
Уьстимиздеги йылдынъ кырк кийик айынынъ 29-ншы куьнинде республикамыздынъ халк яратувшылык уьйинде XVIII «Радуга» деп аталган яратувшылык шарасы озгарылды.
Йыл сайын бу шарада видеокоьрсетуьвлерди сокпага суьетаганлар катнасадылар. Сол коьрсетуьвлерде олар оьз миллетининъ маданиятын, аьдетлерин, саниятын шайытлайтаган билдируьвлерди бермеге шалысадылар. Солардынъ ишлерине миллеттинъ маданиятын саклавга оьз куьшлерин салатаган аьдемлер акында билдируьвлер киредилер. Бу йылгы шара да тап сондай болып, миллет маданиятын саклавга, оьсип келетаган несилди тербияламага эм уьстимиздеги – Россия бойынша эс эм данък йылына багысланган.
Бу йыл шарада Россия элининъ алты регионларыннан элли аьдем катнаспага деп аьризе берген эдилер. Олардынъ куллыкларына белгиди Россия Федерациясынынъ кинематографистлердинъ союзынынъ агзалары, маданият эм саният аьрекетшилери, телевидениединъ режиссерлары бердилер. Шара бойынша «Кеспили студиялар» эм «Муниципаллы, байыр студиялар эм аьвлигетаганлар» деген номинациялар бойынша белги берилди. Шарады тамамлай келип, ийги дегенде ийгилер болып, Махачкала, Кизляр, Каспийск, Магарамкент, Гумбет, Бабаюрт, Ахты, Хасавюрт эм сол санда Ногай районымыздан барган аьдемлердинъ аьзирленген фильмлери белгилендилер.
Бизим ердесимиз, талаплы ясларымыздынъ бириси Арслан Бакиев шарага «Сраждин Батыров фонды» деген студиясы ман аьзирленген «Домбыра» деген видеофильмин алып барды. Ол, бу фильм аркалы, домбырадынъ терен маьнесин коьрсетпеге шалысты. Фильм негизинде яс аркага саз алаттынъ алдын кайдай орыны болганы акында анълатув этиледи.
Буьгуьн бизим ердесимиз савгалы уьшинши орынга тийисли болды. Биз Арслан Бакиевти ак юрегимизден етискен етимиси мен кутлаймыз.
Алдыда аьли де талаплы режиссерымызга уьстинликлерди йораймыз.
Г.Сагиндикова.
Суьвретте: А.Бакиев савгалав шагында.
