Ногай районынынъ Терекли-Мектеб авылынынъ Кадрия Темирбулатова атындагы ортак билимлендируьв мектебининъ окытувшылары оьз эрки мен мектеб азбарын, тоьгерегин эм Ф.Капельгородский атындагы район паркынынъ айырым ерлерин тазалав субботниклерин оьткерип баслаганлар.

Аьдемнинъ яшавы тек онынъ уьйи, азбары, ис орыны, балаларынынъ онъып-оьсуьви мен кораланып калмайды. Дуныя уьйкен эм туьрли. Азбарымыздан шыксак ок, орамды, авылды, авыл ишиндеги онъайлы эм онъайсыз затларды да коьремиз. Коьремиз эм биздеги коьп йыллардан бери туьзилген колайсыз йорыкка коьре солардынъ яныннан уьндемей оьтип те кетемиз…

Мине тап сол йорыкты буздылар янъыларда Терекли-Мектеб авылынынъ Кадрия атындагы орта мектебининъ окытувшылары! Дурысында, олар алдынгы бизим ийги аьдетимизди яшавга кайтарувга сокпак салдылар. Быйыл язда бу мектебтинъ окытувшылары оьз суьйимлиги мен мектеб азбарын, онынъ тоьгерегин эм район паркынынъ аллеяларын кокыстан тазалав ислерине киристилер. Акша, мактав, сый уьшин тувыл! Тувган районымыздынъ орталыгын бир кишкей сама ийгилендируьв, йорыкка келтируьв уьшин.

– Район паркы хыйлы ерди бийлегеннен себеп, биз соны тазалап уьлгире алмаймыз, – дейди сонынъ директоры Александр Аметов. – Кадрия атындагы мектебининъ окытувшылары сондай исти эткенлерин коьргенде, тоьбемиз коькке еткендей болып суьйиндик! Суьйинмей болмаймыз, неге десе коьп йыллардан бери алдынгыдай район организациялары эм учреждениелери парк ишин тазалав субботниклерин оьткермейдилер. Ол коьз алдымызда кокып ятады. А бу окытувшылар сол шаклы йыллардан бери районымыздынъ «еннетин» оьз коллары ман тазалап баслаган биринши коллектив болып туры. Разылык сизге, йолдаслар!

Элбетте, бу исте мектеб директоры Альфия Акимова ман завучы Кабират Махмудовадынъ да уьлиси бар, неге десе баьри зат та бастан басланады.

Дурысында, районда ялгыз бир уьйкен паркымыз бар. Тек ол оьзине каравды куьтеди. Элбетте, соны карайтаган куллыкшылар да бар эм олар оьз исин намыслы толтырадылар, ама парк ерининъ оьлшеми заьлимдей уьйкен, коллар етиспейди… Кадрия атындагы мектебининъ окытувшылары коьрсеткен ис коьримин баьри коллективлер де хош коьрмеге тийисли.

М.Юнусов.
Суьвретте: мектеб окытувшыларынынъ эм куллыкшыларынынъ айырым куьби.