Ызгы йылларда шахматлар бойынша балаларымыз етисип турган уьстинликлер бизди суьйиндирмей болмайды. Оларга сол уьстинликлерге етиспеге спорттынъ бу кебине суьйими, шалысувы соны ман бирге сулыплы окытувшысы Арслан Елакаевтинъ берген билими коьмек этеди. Сол окытувшыдынъ етекшилиги астында уьйренуьв де, бакты ман буйырган ийгилик, деп айтпага болады.
Янъыларда биз аьли де бир ийги хабар эситтик. Нариман авыл мектебининъ окувшысы Мухаммед Караянов шахматлар бойынша республикалык турнирининъ чемпионы болган. «Осенний кубок» шахматлар бойынша турнири янъыларда Махачкалада оьтти. Белгиленген шарада савлай Дагестан республикасыннан 102 окувшы катнаскан. Мухаммед Караянов Махачкала, Хасавюрт, Каспийск калаларыннан келген куьшли ойнавшылардынъ баьрин де енъип, турнирдинъ енъуьвшиси болды.
– Мухаммед Караянов биринши кере мундай уьйкен турнирде катнасып туры эм сосындай уьстинликке етисти. Меним тербияланувшым шахматлар ман озган йылдан алып каьр шегеди. Ол бек сабыр бала, оьзининъ эткен исин арымай-ялкпай толтырады эм сол аркалы ийги сырагыга етиседи. Солай ок Мухаммед Ставрополь крайында озган турнирде катнасып, 2-нши орынга тийисли болган, – дейди онынъ тренери Арслан Елакаев.
Дагестаннынъ шахматлар Федерациясынынъ президенти Джакай Джакаев Мухаммед Караянов акында булай айтады: «Ногай районында шахматлардынъ янъы юлдызы шыкты. Сенемиз онынъ кеспили ойнавшы болаягына эм оьзининъ янъы енъуьвлери мен бизди суьйиндиреегине».
Биз ак юректен Мухаммедке Джакай Джакаев эткен сеними толганын йораймыз. Аьли де онынъ атын ийги яктан эситеегимизге шекленмеймиз.
«Осенний кубок» шахматлар бойынша республикалык турниринде Ногай районыннан Арслан Елакаетинъ 9 окувшысы катнасты. Соьйтип, Абакар Шангереев 14 ясына толмаган балалар сырасында 1-нши орынды казанды. Альмира Киреева ортак зачетта 3-нши орынга, Эмирлан Саитов 2012-2013-нши йыл тувган балалар сырасында 2-нши орынга тийисли болды. Энъ де кишкей ойнавшы Т. Уразакаев та, ога тек 6 яс, бек ийги ойнады. Ол баргылы орын бийлемесе де, 6 ойында 4 кере енъуьвши болды. Балалардынъ баьрине де уьстинликлер!
Н.Кожаева.
Суьвретте: Д.Джакаев эм М.Караянов.