Бу енъуьв бирден келди деп айтпага болады. Янъыларда Каспийск каласында озган, «Высший класс» деп аталган футбол турниринде яркыраган ойынды коьрсеткен, Ногай районымыздан барган «Бирлик» балалар футбол куьбининъ етискен уьстинлиги акында специалистлер, туьрли социаллык сайтларда уьйкен сейирсинуьв мен хабарладылар. Енъуьвлер болсалар, кайсы куьптинъ де оьзининъ аты айтылады, футбол болса, футболистлер акында, волейбол болса, волейболистлерди атлы-аты ман айтадылар, а оларды уьйреткен, ойын сырларын ашатаган тренерлер коьринмей де каладылар.
Ногай районымызда кеспили футбол клубы йок, ама бу куьнлерде оьзининъ исин суьйген, балаларда сенимди коьрген, оларды ийги ойынга даьвлендирип болган Алан Алибек увылы Ярикбаев бар. Аланнынъ аты бизим газета бетлеринде биринши кере шыкпайды. Биз оны яслай таныганмыз. Ол оьзи балалыгыннан спорттынъ футбол кебин бек суьйген эм Россия алдышылыгында озгарылган ойында оьзин ийги яктан коьрсеткен кеспили футболист болады.
Алан бу куьнлерде оьзининъ ян шакырувы ман Ногай районымыздынъ эки юз эллиге ювык балаларын футбол ойынына аьвликтирип, уьйретеди. Ол оьзи 2010-ншы йылда етинши классынынъ окувшысы болып, Махачкала каласындагы Маркаров атындагы спорт мектебинде футбол бойынша толтырма билим алып баслайды, оьзи сонда ок 39-ншы номерли лицейде окыйды. Сонда Алан куьннен-куьнге оьзининъ сулыбын байытады, оьрленеди. 2012-нши йылда ол республикамыздагы «Анжи» Академиясынынъ туьзилисине киреди (Маркаров атындагы спорт мектебиннен 20 аьдем бар болган, сол санда Алан да бар эди). Бу айтылган куьптинъ туьзилисинде болып, Алан Ярикбаев Турция, Словения, Барселона ерлеринде де ойынларда катнаскан (негизли ойынларда болмаса да).
– Сол ерлерде болган ойынлар мага коьп сулыпты берген. Биз Турцияда, Словенияда эм Барселонада болса да, негизли ойынларды ойнамаганмыз, ама атлары белгили болган куьплер мен аьзирленгиш ойынларды ойнап, оьзимиздинъ усталыгымызды арттырганмыз. Мен сол йылларда СКФО алдышылыгы уьшин ойында, Рождественский турнирде «Лучший полузащитник» деген атларга тийисли болганман, аьли уьшин мырадым – Ногай районымыздынъ балаларын кеспили ойынга уьйретуьв эм олардынъ атын беркитуьв, – дейди Алан Ярикбаев.
Мен Алан ман хабарлайман, ол мага оьзининъ таза коьнъиллиги мен аьр бир ойын, аьр бир куьптинъ агзасы акында айтады. Бизим халкымызда бир ийги соьз бар «Ясты коьрсенъ, куьшин ал, картты коьрсенъ, акылын ал» деген, бу соьзди тувра анълап, «тартып» алув тувыл, ястынъ да оьз ойлары, яшавга карасы болады, болганда да, сен тынълагандай. Алан да тап сондай яслардынъ бириси. Оьзин тынълатып та болгандай. Ол Дагестан Республикасынынъ педагогикалык окув ошагын кутарганнан сонъ, оьзининъ хабарлавына коьре, ден савлыгы бойынша футбол ойынды коймага туьскен, Ногай районында балаларды кеспили футболга уьйретпеге токтаскан. Баслап ол, сол куьпти туьзуьв уьшин коьп куллык этпеге туьсеегин де анълайды, ама оьз ойы ман «Ногайский район» МР администрациясынынъ аькимбасы Мухтарбий Аджеков пан боьлиседи. Ол Аланды колтыклады. Ногай район аькимбасы болар деген соьзин ыслап, заманга келисли футбол майданын курды. Аьли уьшин сол майданда ойынлар юредилер. Ногай районы бойынша ДЮСШ-2 тренери болып, Алан Алибек увылы 7 ястан алып 14 яска дейим балаларды футболга уьйретеди. Бу куьнлерде Каспийск каласында яс футболистлер Акболат Межитов, Султан Аджибайрамов, Расул Магомедов, Исмаил Атюгеев, Крымсолтан Ханмурзаев, Амит Манкаев, Нурлан Эдильбаев, Сайдахмад Аджигайтаров, Булат Толубаев, Ахмад Баймурзаев, Мухаммад Аджигайтаров, Карим Ярикбаев, Далгат Тангатаров, Султан Ярикбаев, Джамал Отевалиев, Абдулвахид Азимов, Тимурлан Бекбаев оьзлерининъ ойынга аьзирлигин коьрсеттилер.
– Мен бу балаларды ойынга аькетуьвим де босына тувыл эди. Аьзирликлери яман болмаса да, енъуьвди куьтпеген эдим, тек кеспили футболистлер мен ойнасалар, сулып аларлар деген ойым бар эди. Бизим «Бирлик» куьбимиз сегиз кеспили футбол клубларынынъ куьплери мен бир сыраларда болды.
Биз биринши болып, «Анжи» Академиясынынъ куьби мен, сонъ “Young Boys” филиалынынъ куьби мен ойнадык, эки кере де 1:0 ман енъдилер. Аьли уьшин биз Каспийск каласында алдыда оьтеек балалар футбол фестивалинде ойнамага ыхтыяр алдык. Сол бизге аьли уьшин бек уьйкен етимис. Бу ерде мен сизи мен оьз сырым ман боьлиспеге суьемен, ойын алдында мен оьзимнинъ балаларыма:
– Эгер сиз ийги ойынды коьрсетсенъиз, мен сизди Дагестан Республикасынынъ алдышы футболистлерининъ бириси М.Сулейманов пан йолыгыстырар ман, – деп соьз берген эдим. Ойын кутылганлай ок, балалар мага соьзимди ысламага керегин анълаттылар. Амал йок эди. Мен Могомед-Шапи Камиль увылы Сулеймановка, ол «Краснодар» клубынынъ полузащитниги, тилек салып, балаларга оьз маслагатларын бермеге шакырдым. Ол меним соьзимди туьсирмей, бизим балалар ман йолыгысты, олардынъ берген соравларына да явап берди эм бу куьн коьрсеткен ойын уьшин мактады, – деп уьйкен суьйиниши мен хабарлайды Алан-бебемиз.
«Бирлик» куьбининъ футболистлери коьрсеткен ойын, элбетте, мактавга эм куьезленуьвге тийисли. Оларды аьзирлейтаган Алан Ярикбаевке тек куьшти эм керекли яктан колтыклаган аьдемлер янында дайым болганды йораймыз. Ол оьзининъ янын берип куллык этеек яслардынъ бириси, солай болган ерде «Бирлик» футбол куьбимиздинъ де келеектегиси бар.
Г.Сагиндикова.
Суьвретлерде: «Бирлик» футбол куьби оьз тренерлери мен; ойын юрген шакта.
