Балалардынъ оьнерли, билимли болганына баьримиз де суьйинемиз, куьезленемиз. Талаплы балалар келеекте эли уьшин пайдалы боладылар, олардынъ билими, сол билимге таянып, аьрекет этуьви элимиздинъ оьрленуьвине салдарлы уьлис косады. Бала мектебте ийги билим алса, сонъында ога орта эм йогары окув ошакларында да окымага тыныш болады.
Тамирлан Сахтаев – Махачкала каласында республикалык «Талаплы балалар орталыгы» лицей-интернатта окыйды, быйыл ол 9-ншы класска коьшти. Лицейде Тамирлан тек бир йыл окыса да, оны окытувшылар да, оьзи мен бирге окыган тенълери де билимли деп биледилер. Бир йылдынъ ишинде кеде оьзин оьнерли, окымыслы окувшы деп коьрсетти.
– Уьстинликлерге ымтылган Тамирлан Сахтаев биология, химия, матемитика эм физика сабаклардан йогары билим коьрсетти, окув йылын тек бесевлерге битирди, бир куьн де окувдан себепсиз калмаган.
Тамирлан оьз мыратларын толтырувда шугыл бала, керек ерде оьз ойын айтып та, коршалап та болады. Билим алувга абытын каты басып барады. Бирге окыйтаган тенълери мен Тамирлан ийги катнасады, окытувшыларга сый этеди, тынълавлы. Т.Сахтаев лицейдинъ ямагат яшавында белсен катнасады, класс етекшиси эм лицейдинъ администрациясы берген борышларды, талаплавларды ерине еткерип толтырады. Тамирлан спорт пан да аьвлигеди, – деп хабарлайды Тамирлан акында класс етекшиси М.Гаджиева. Тамирлан мектеб эм муниципальли олимпиадаларда, спорт ярысларда катнасады эм ийги сырагылар береди. Сол затты кедединъ коьплеген Сый грамоталары шайытлайды. Окыйтаган лицей ишинде «Сеним» деп аталган математика бойынша мектебте олимпиадада коьрсеткен билими уьшин Тамирланга мектеб директоры Г.Габибулаев атыннан грамота тапшырылды. Кайтип ярасык этип Тамирлан домбырада ойнайды, йырлайды, ол Терекли-Мектеб авылында С.Батыров атындагы саниятлар мектебинде «домбыра» классы бойынша (етекшиси Ралина Арсланали кызы Махмудова) окыган. Тамирлан туьрли анъ конкурсларында катнасып, баргылы орынларды алган. Нурсултан каласында озгарылган «Анъыз дала» халклар ара вокал-инструментальли конкурсында катнасып, яс домбырашы биринши орынга тийисли болган. Сондай грамоталар, разылык хатлар Тамирланда аз тувыл.
Тамирланнынъ уьйкен атайы Абдулла Куруптурсын увылы Сахтаев шатраш ойыны ман аьвлигетаган эди, бек куьшли ойнайтаган эди, сол оьнер онынъ баьри уныкларына да коьшкен. Тамирлан да шатраш турнирлерде катнасады эм биринши орынларды алады. Быйыл Тамирлан «Артек» лагеринде болып келди, ол барган смена «Енъуьвдинъ асабалары» деп аталган эди. Тамирланга лагерьде бек ярады.
Тамирлан Сахтаев алдына коьп мыратлар салады. Ол келеекте хирург болмага ниетленеди. Мен онынъ йоллары дайым ашык болсын деп йорайман, уьстинликлерге абытын каты басып, аьр заманда да енъуьвши бол деп айтаман.
Г.Абдулакимова.
Суьвретте: Т.Сахтаев.