Яс аьдемнинъ алдында йоллар ашык. Бу куьнлерде коьп зат онынъ оьзининъ мыратларыннан, ойлаган ойларыннан себепли болады. Ол оьз бактысынынъ иеси. Ногай районымыздынъ кишкей авылларынынъ бириси Калининде тувып-оьскен, сол авылдынъ мектебинде де окып, билим алган.

С.Капаев атындагы мектебининъ окытувшылары онынъ сонъында коьрсеткен терен билимининъ негизин салган боладылар. Аьли меним соьзим сол яс специалист Ислам-Али Мурзабек увылы Кульдиев акында. Ол, мектебтинъ 9-ншы классын окып кутарганнан сонъ, Янъы Уренгой каласындагы ЧПОУ Газпром техникумын уьстинликли окып битирди. Окув йыллары ишинде Ислам-Али оьзин тек ийги яктан коьрсетип келди. Онынъ коьплеген Сый грамоталары, енъуьвши болганын коьрсететаган медальлери бар. Айтпага, ол коьп кере, окыган йыллары ишинде неше кере озгарылган, сол шаклы кере «Яслар наркотиклерге карсы» спартакиадасында катнаскан эм енъуьвши де болган. Алаяк кесписи бойынша озгарылган не шаклы конференцияларда ортакшылык эткен. Соларда оьзин де коьрсеткен, сулып та алган.
«Баьри затты да этип боламан» деп озгарылган кеспилик усталыгы бойынша шарасында сыйлы биринши орынга тийисли болган. Ол техникум бойынша алдын болган рекордты бузган. Энди Ислам-Алидинъ салган рекордын ким бузар экен?
Ислам-Алидинъ бу куьнлерге етимислери аз тувыл. Яс специалистти ийги билимди коьрсеткени уьшин Тюмень областининъ индустриальный университетининъ инженер-технологиялык факультетине окымага йибердилер. Энди Ислам-Алидинъ алдында – йогары окув ошагы. Ол сонда да терен билимин коьрсетер.
Алдымызда Россия яслар куьни, Ислам-Алидей ясларымызга тек уьстинликлерди эм куьшинъиз еткен шаклы, билимди теренлетуьвди эм келеекте тек тувган еримиз уьшин аьрекет эткенди йораймыз.
Г.Сагиндикова.
Суьвретте: Ислам-Али Кульдиев диплом алады.