10-12-нши июльде «Йибек йол» халклар ара раллидинъ россиялык кезеги Дагестан ериннен оьтеек.
Бу проект тарихи 2009-ншы йылдан алып басланган, коьп йыллар бойы тек Россия Федерация регионларын тувыл, Евразия эллерин де бирлестирип. Бу йыл ралли маршруты 6-16-ншы июль куьнлеринде Дагестан, Калмыкия, Чечня ериннен, Астрахань, Волгоград, Воронеж, Липецк, Тула областьлериннен эм Москва каласыннан оьтеек.

Дагестанда ралли катнасувшылары Ногай район ериннен оьтееклер. Фанзона Нариман авылында аьрекет этеек: 10-ншы июльде – 11.00 саьаттен 15.00 саьатке дейим эм 12-нши июльде – 08.00 саьаттен 12.00 саьатке дейим. Кызыксынган баьри аьдемлерди бу уьйкен шарада ортакшыламага шакырамыз.
Ралли тез юретаган мотоцикллер, внедорожниклер, грузовиклер, эм, туьрли ралли шарасында ортакшылаган эм дуныя юзинде атлары белгили ралли катнасувшылары ара озгарылады.
Бу ярысларды уйгынлав эм озгарув бойынша ортак етекшилевди Россия Федерациясынынъ Спорт министерствосы, РФ Президентининъ яклавы ман автомобиль спортынынъ «Россиялык автомобиль федерациясы» деген ортак россиялык организациясы юритедилер.