Аьр бир хатынды шешекей мен тенълестирмеге болады. Сол да сейир тувыл, яшавдынъ туьрли аьллеринде биз, хатынлар, гуьл кимик сеземиз суьйиништи де, кайгыды да. Мен коьплеген йыллардан бери таныйман Шахбике Абдулла кызы Янбулатовады. Оьзининъ оьзденлиги мен, рахатлы юзи мен, тавысы ман ол оьзине каратпай болмайды. Шахбике Абдулла кызы Ленинаул китапханасында ислейди, сога коьре яратувшылык шараларда коьрисемиз, янасып, аманшылык сорасам, аьр заманда да йылы куьлемсирев мени кушагына алады. Мен оны кызылгуьл мен тенълестирер эдим. Биринши караска – коьп соьзи йок кыскаяклы кызылгуьлдей болып, сувык, ама оны ман соьйлесенъ, коьз- лериндеги куьлемсирев оны тап янъы ашылган шешекейге усатып, ярасыклайды. Асылы ман Шахбике Янбулатова Карасу авылдан, Машаковлардынъ аьелиннен. Баслапкы классларды Карасу авыл мектебинде окыган, сонъында Кумлы авыл орта мектебинде 8-нши классты битирип, Карачаевск каласына окувга туьскен. Сонъында онынъ ис аьрекети де басланды. 1994-нши йылдан алып Шахбике Абдулла кызы Ленинаул авылында китапхана куллыкшысы болып ислейди. Коьп куллыклар этеди ол, туьрли шаралар, коьп заманда мектеб куллыкшылары ман биргелесип, озгарады шараларды. Туьрли эстеликли куьнлерге багыслап, выставкалар, докладлар аьзирлейди. Онынъ иси акында коьп ийги соьзлер Ленинаул мектебининъ директоры Кабират Аккишиева айтады.
– Шахбике Абдулла кызы бизге оьз коьмегин этеди, келип, кайсы байрамга кайтип аьзирлик коьрейик деп сорайды, бар макалаларын, билдируьвлерин аькеледи. Соьйтип, бирге коьп шаралар озгарамыз, – дейди ол.
Инсаннынъ кайдай куьш-куваты бар. Сол затка мен кайзаманда да сейирсинемен. Шахбике Янбулатова да коьплеген кыйынлыклардан да оьтти. Ян йолдасы Казмагомед Зейнадин увылы (яткан ери ярык болсын) халкымыздынъ белгили аьдеми эди, онынъ эртеден дуныядан кешуьви хатынды кашан да сындырмаса да, куьйдирди. Болса да, Шахбике Абдулла кызы наьсибининъ басы – балалар деп, яшавын бардырады. Кызлары Наида эм Мадина, йиенлери (онынъ 8 йиени бар, Аллага шуькир) ога мунъаймага бермейдилер.
Барады алдыга яшав. Янъыларда Шарбике Янбулатова оьзининъ 60 йыллык мерекесин кардаш-тувганлары, балалары, ис йолдаслары тоьгерегинде карсы алды. Бар арамызда сондай танъ эм оьзден хатын. Мен ога баьри ийгиликлерди йорап, тувган куьни мен эм Хатын-кызлар байрамы ман кутлайман.
Г.Бекмуратова
Суьвретте: Ш.Янбулатова.