Уллы классиклеримиздинъ бириси Лев Николаевич Толстой окытувшы акында булай деген: «Эгер окытувшы оьз иси мен окувшыларына суьйимди косса, ол – ийги окытувшы».
Булай алып караганда да, окытувшыдынъ кесписи енъиллерден тувыл. Окытувшыдынъ кесписин алган аьдемлердинъ баьриси де шынты окытувшы атты казанмайды. Эгер сол затты окытувшы кесписин сайлаган аьдем сезсе, ол окытувшы болып ислеп те болмайды. Сакинат Сифула кызы Кельдимуратова окытувшы кесписин алганлай ок, окувшылардынъ юреклерине йол излестирип баслайды. Ис аьрекети бойынша ол салган ниетине, мырадына етисти деп ойлаймыз. Ол аз окувшылар несилин тербияламады. Сакинат Сифулаевна педагогикалык ис аьрекетин 1972-нши йыл Карагас авыл орта мектебинде баслады. Мунда ол баслап эсап дерисин береди, оннан сонъ, ис йыллары ишинде баслангыш класслардынъ окувшыларын окыткан. Сакинат Сифулаевна Кельдимуратова кайсы ис орында да оьзин тек ийги этип коьрсетип, тапшырылган ис аьрекети бойынша тек яваплылыкты сезип, ислеп келди. Ол оьзине тапшырылган окув бойынша мектеб етекшисининъ ис аьрекетин бардырган заманы да болды. Ол сол куллыкты да бек ийги юриткен.
– Онынъ сусы, соьйлеген соьзи, аьр бириси ис аьрекети бойынша, алдыга салынган борышларды толтырув ман байланыслы болатаган эди, – дейди онынъ ис йолдаслары.
Сакинат Сифулаевна балалар ман берк коьпирди туьзип болатаган окытувшы эди. Ога окувшылар коьп затларын сенетаган эди. Ол баслап окытувшы, сонъ ийги йолдас болып болатаган эди.
– Мен яшавымнынъ кырк бес йылга ювык заманын окытувшыдынъ кесписине багыслап келдим, сол йыллар ишинде кайдай касиетли балады да коьрдим. Баслапкы караска балалар баьриси де бир аьлемет болып коьринеди, араларында айырымланмага суьетаганлар да боладылар. Ама баьриси де олар ишки дуныясы ман оьпкелемеге аьзир боладылар, – деп эскереди ис йылларын Сакинат Кельдимуратова.
Сакинат Сифула кызы Кельдимуратова Ставрополь крайынынъ Тукуй-Мектеб авылында 1952-нши йылдынъ навруз айынынъ 9-ншы куьнинде тувган, онынъ бала-шагы Ногай районымыздынъ Орта-Тоьбе авылында оьткен. Оьз тенълери мен бирге мектебте де окыды. Сол йылларда ол окытувшыларынынъ баьри берген билимин алмага шалысып келди. Оьз классында Сакинат ийги окувшылардынъ алды сырасында туратаган болган. Сол йыллардагы окытувшылары ога армаганда яшав йолында сол кеспиди сайлавга йол да берди.
Бу куьнлерде педагогикалык исининъ ветеранын Карагас авыл орта мектебинде окувшылардынъ кызыксынувын коьтерип болган, оьз исин ийги билген, аьр бир баладынъ касиетине коьре аьрекетин бардырып болатаган окытувшы эди деп эслерине аладылар. Мектебимиздинъ язылып калган тарихинде Сакинат Сифулаевнадынъ мектеб етекшиси орынында болып озгарган шаралары коьплердинъ эслеринде.
Бу куьнлерде Сакинат Сифула кызы Кельдимуратова тийисли тыншаювда. Онынъ окувшылары эткен исин аьли де мутпайдылар, аьр бир байрамда да ога уьйкен эс берип, узакта болса, тел согып, аманшылыгын сорайдылар.
Алдымызда Хатын-кызлар байрамы, сол байрам ман бирге Сакинат Сифула кызы оьзининъ тувган куьнин де белгилейди. Бизим халкымызда айтылганлай, «Наьсипли аьдемнинъ эки яхшылыгы бир келеди», – деп. Сога коьре, Сакинат Кельдимуратова наьсипли хатынлардынъ бириси деп санайман эм сол наьсипли инсанга алдыда тек яхшылыкларды эм узак оьмирди йорайман. Тувган куьнинъиз де, Халклар ара Хатын-кызлар байрамы да хайырлы болсын!
Н.Зарманбетова.
Суьвретте: С.Кельдимуратова.
