Аьр бир инсаннынъ оьз бактысы бар. Халк арасында айтылганлай, бактыды айландырып, наьсипти сатып алып болмайсынъ, сол сага айырым етимислеринъ уьшин бериледи. «Наьсип» дегенди, талаплы ногай язувшымыз Салимет Майлыбаева оьз асарында, сонъында йырга айланган, сийрек кус пан тенълестиреди, ол дайым бир аьдемге келмейди, айланганда конатаган зат. Мерекеши аьдемлердинъ наьсип дайымлык конагы болады демеге боламыз. Сондай ойга мен, бу куьнлерде оьзининъ тувган куьнин белгилейтаган Мадина Муса кызы Абдулалимова ман хабарласканнан сонъ, келдим деп айтпага боламан. Мен ис аьрекетим бойынша Мадина Муса кызы ман бир неше кере расканман. Аьр йолыгысым эсимде деп айтпага боламан.

Аьр аьдемнинъ касиети, турган турысы, эгер дережели ис орынында ислейтаган болса, сени йолыгувы баскаша болады. Бир етекшилер сени уьйкенсип, каты сусы ман йолыгады, баскалар уялшанъ аьлде соьйлейдилер. А Мадина Муса кызынынъ йолыгысы баьрисиннен де баскаланады, (кайсы ис орында болганда да мен онынъ кабинетлеринде болганман, ол бир неше туьрли организацияларды етекшилеген, аьр бириси акында алдыда билдирермен), ол кабинетине кирип келгенинъди коьрсе, йылы куьлемсирер, саламын да берер. Касиетине карап, юмсак аьдем деп те айтпас эдим, соьйлей келе оьзине тартатаган инсан. Кыскаша айтканда, меним аьр бир хабарласувым дослык соьйлесуьв болып оьтеди.
Мереке. Аьр бир аьдем яшавынынъ сырагыларын келтиретаган заман.
Аьр бир тувган аьдемнинъ оьзининъ бактысы, йолы болады. Маьлиек соны ман алып барады. Сол йол бир де каты, бир де енъил де болады.
Мадина Муса кызынынъ яшав йолында кайдай куьнлер де, йоллар да болган.
Бу куьнлерде ол оьзин бек наьсипли инсанлар санында деп санайды.
– Наьсип аьелден басланады. Мен коьпбалалы аьелде тувып, тербия алдым. Уьйкенлер аьелде бизге ийги коьрим болдылар. Аьр биримизге атамыз бан анамыз тийисли билим бермеге шалыстылар.
Аданасым ман аьптелерим окувдан келуьвди сагынышлы карап туратаган эдик, олар келсе, уьйимизде завыклык эм куваныш эди. Олар бизди тоьгерегине йыйып, туьрли эртегилер, хабарлар окыйтаган эдилер. Баьриннен де ийгиси– олардынъ аькелетаган савкатлары. Язгы тыншаювлар келгенде, аьелде кишкейлерди, аьптелеримиз Махачкалага кыдыртып аькеткен заманлар да болган…», – деп хабарлайды Мадина Муса кызы Абдулалимова (кыз тукымы Аджиева).
Сонъында Мадина Терекли-Мектеб авылынынъ орта мектебин уьстинликли окып битирип, Махачкалада педагогикалык окув ошагынынъ тарих факультетин окып битирди. Окытувшы кесписин сайлавда ога уьйкен уьлги окытувшысы Зухра Круптурсун кызы Мурзаева болган.
Мадина Муса кызынынъ бу ерге дейим яшав йолы тенълериндикиннен коьп баскаланмайды. Мектеб, студент йыллары. Ис аьрекетин ол А.Джанибеков атындагы мектебинде тарих сабагыннан окытувшы болып баслайды. Сонъ басланады етекшилик ис аьрекет.
– Мен 1991-нши йыл Кадрия атындагы мектеби ашылганлай ок, етекши болып ис аьрекетимди басладым. Сондагы йыллар меним етекши болып кепленуьвим эди. Ясырмай айтпага керек болады, меним етекши эм ийги специалист болып кепленуьвиме талаплы эм терен билимли окытувшы Сталинат Казмухамбетовна Заргишиева уьйкен уьлисин коскан. Мен Кадрия атындагы мектебининъ етекшиси болып баслаганда, ол окув бойынша орынбасар ис аьрекетин баслады. Ол мага коьп затларды оьмезленмей коьрсетип эм анълатып келди. Сога коьре, мен Сталинат Казмухамбетовнага уьйкен разылыгымды билдиремен. Мен етекшилеген ис коллектив те бек ийги эди. Оьзек те, ис юреди, эгер янынъда ийги ис йолдаслар болса. Йылувлык пан эсиме аламан окытувшылар: З.Мусауровады, З.Авезовады, Ф.Мусау- ровады, Ф.Кадиловады, И.Валиевады, И.Сулейма- новады, С.Тангатаровады, М.Отаровады эм М.Ман- суровады. Олар мага ис аьрекетти йогары дережеде бардырмага эм окув бойынша сапатлы билимди коьрсетпеге ярдамын этип келдилер.
Мен кайсы ерде де оьзиме сенип, ис аьрекетимди бардыраман, ис оьрге юргенди суьемен, соны бизге ата-анамыз коьндирген, – дейди Мадина Муса кызы.
Сонъында Мадина Муса кызына Ногай район администрациясында ямагат кавыфсызлыгы бойынша орынбасар болып ис аьрекетти бардырмага туьсти. Бу ис орын Дагестан Республикасындагы аьллерге коьре, госсоветининъ карары ман токтастырылган эди. Сол ис орында да Мадина Муса кызы белсенли куллык этти.
Аьлиги заманда артта калды онынъ Терекли-Мектебтеги Россельхоз банкынынъ филиалын, почтадынъ почтабанкын етекшилеви. Аьр ерде де етекши янъылыклар эм ис аьрекетшилерге онъайлыклар туьзуьв уьстинде ислеп келди.
Буьгуьн болса, мен Мадина Муса кызы Абдулалимова ман Ногай районынынъ пенсионлык фондынынъ меканындагы етекшисининъ кабинетинде йолыгыстым, неге десе ол мунда етекши.
Пенсионлык фондын Мадина Муса кызы етекшилейтаганы коьп заманлар болган йок, ама бу ис аьрекетти де ол уьйкен алаллык пан бардырады. Алдыда планлар да аз тувыллар.
– Буьгуьнлерде янъы билимлендируьв коммуникационлык технологиялар аркалы коьп уьстинликлерге етисемиз. Айтпага, клиентлик сервисынынъ канагатланувынынъ сапаты оьседи, мониторингтинъ тамамлары ийгиленеди, коьп ерлерде кавыфсызлык оьседи. Тезден пенсионлык фондынынъ ис борышлары оьсуьв акында соьз коьтериледи. Олай дегеним, пенсионлык фондына социаллык страхование борышлары да косылаяк, сонъ медициналык страхование косылаягы акында да хабар бар. Кыскаша айтканда, ис борышымыз оьседи. Соны ман бирге бизим организациямыз да оьрленеди деп айтпага боламыз, – дейди сулыплы етекши. Хабарласа келе, сол оьрленуьв коьп онъайлыкларга аькелеегин анълайман. Пенсионлык фондынынъ ишинде ортак цифровой платформадынъ болувы баьри социаллык колтыклав бойынша белгиленген шараларды бириктиреди. Сол платформа аркалы аьдемлер онынъ менлигин коьрсеткен документсиз пенсиясын да, тийисли социаллык пособиесин де алып болаяк. Солай ок, сол Ис министерствосынынъ да, пенсионлык фондынынъ да, социаллык страхование фондынынъ да эм социаллык-медициналык учреждениелерининъ де билдируьв тармакларын биргелестиреек.
Тыныш болмаган ис аьрекетти уьйкен яваплылык пан бардырады Мадина Муса кызы Абдулалимова.
– Мага коьп ерде яваплы ис орынларда етимисли ислевде аьелим ярдамшы болады. Эрим Адильхан, увылларым Алан-Али, Абдул-Ажи, келиним Замира эм уныкларым Нурмагомед, Разия (уьйкен тетейининъ атын алып барады) эм кишкей Мадина (ога увылым меним атымды берген, (Келеекте ога да Алла Таала уьйкен наьсипли йолды берсин.Г.С.)).
Мен бу ерде де бактыма бек разыман, мага сондай алал косакты бергенине. Адильхан ман экевимиз бир авылда тувганмыз, бир мектебте де, бир йыл, ама туьрли классларда окыдык. Ол мектебтен сонъ Новочеркасск каласында гидромелиоративный йогары окув ошагын окып битирди.
Увылларым оьз уьстинликлери мен суьйинтедилер. Мен олардан тек окувды эм ийги ислевди талаплап тураман. Ийги куллыкшы кайсы ерде де сый эм абырай казанады. Экеви де йогары кеспи алганлар. Кенжепайымыз Абдул-Ажи буьгуьнлерде аспирантурадынъ студенти болады. Ол экономика тармагы бойынша илми куллыгын бардырады.
Аьел акында соьз бардырып, келин акында соьз айтпасак дурыс болмас. Келиним Замира бек ийги аьел тандырын саклавшы. Ол сый дегенди билетаган кыскаяклы, – дейди мерекеши.
Сый. Сыйлавга етисуьв де тынышлардан тувыл. Инсанлар ис аьрекети бойынша, касиети бойынша сол белгиге етиседилер. Мен сыйлы мерекешиге ак юрегимнен ден савлыкты, балалардынъ, уныклардынъ завыкын коьрип, алдыдагы яшавды бардырганды йорайман.
Г.Сагиндикова,
РФ Журналистлер союзынынъ агзасы.
Суьвретлерде: М.Абду- лалимова унык кызы Мадина ман; эри эм кедеси мен.