Янъыларда Ногай районында Кадрия атындагы парк шатлыклы аьлде ашылды. Россия куьнине эм янъы парктынъ ашылувына багысланган шарага «Ногайский район» МР администрациясынынъ, районымыздынъ организациялар куллыкшылары эм етекшилери, район яшавшылары, шаир кыздынъ кардаш-тувганлары, бир соьз бен айтканда, районымыздынъ яшавындагы маьнели оьзгерисининъ шайытлары болмага суьйген аьдемлер йыйылдылар.
Бизим районда янъы, ярастырылган объектлер ашылувы ийги аьдетке кирди. «Единая Россия» Савлайроссиялык политикалык партиядынъ баславы ман йол алган «Формирование современной городской среды» программасы аркалы Ногай районында янъы проектлер яшавга шыгарыладылар, яшавшылар уьшин тыншаймага ерлер, балалар эм спорт майданлар ашыладылар. Кадрия атындагы паркы йогарыда белгиленген проект бойынша салынган 7-нши объект болады.
Йыйылганларды элимиздинъ бас патшалык байрамы ман биринши болып «Ногайский район» МР администрациясынынъ аькимбасы Мухтарбий Аджеков кутлады.
– Россия байрам куьни бизим халкымыздынъ тарих сайлавы ман – элимизде янъы демократиялык туьрленислер болувы ман байланыслы. Ол халклардынъ бирлигининъ, Россиядынъ эм онынъ гражданларынынъ онъайлыгы эм оьрленуьви уьшин бирлесуьвининъ белгиси болады. Бу байрам баьри оьзининъ Элин шынтылайын суьйген, онынъ данъклы озганы ман оьктемсиген эм элимиздинъ уллы келеектегисине сенген аьдемлерди бирлестиреди, – деди район етекшиси оьз соьзинде. Йыйылганларды янъы парк ашылувы ман кутлап, Мухтарбий Аджеков ООО «Рамазан» проектининъ подрядчиги (етекшиси Мурзали Кошекбаев) тийисли заманга куллыкларды тамамлаганын белгиледи, ога эм онынъ бригадасына сапатлы иси уьшин разылыгын билдирди. Район етекшиси паркта ярастырув куллыклар келеяткан 2022-нши йылда да юритилеегин, мунда балалар майданлар эм фонтан салынаягын билдирди. Халк пан суьйдимли, аты бир де мутылмас Кадриядынъ атын юриткен парк Ногай районынынъ коьр- некли ерлерининъ бириси болаягына эм мунда район яшавшылары ман конаклары тыншаймага дайым уьйкен суьйиниш пен келеегине сенимин айтты.
Бу куьнги шатлыкта яшавшыларды ДР Халк Йыйынынынъ депутаты, Курылыс, турак уьй-коммуналлык хозяйствосы, коьлик эм байланыс бойынша комитетининъ председатели Мурат Мамаев, «Ногайский район» МР администрациясынынъ Ямагат палатасынынъ председатели Эльмурза Саитов, Ногай район имамлар советининъ председатели Алиасхаб Танаев, «село Терекли-Мектеб» СП МО администрациясынынъ аькимбасы Зейдулла Аджибайрамов, Ногай районынынъ билимлендируьв боьлигининъ етекшиси Алтын Агаспарова кутладылар.
Эльмурза Саитов ногайларга бай адабиат асабалык калдырган, халкы ман суьйдимли шаир-кызы Кадрия Темирбулатова халкына айткан оьсиетти йыйылганлардынъ эсине салды.
– Бизим уллы Кадрия оьз халкына данъклы тарихимизди, ийги аьдетлеримизди, бай тилимизди сакламага оьсиет эткен. Тилимизди йок этсек, халк та йойытылар деген ол. Соны ман байланыста, мен сизди ногай тилимизди сакламага шакыраман. Биз, ногайлар аз санлы халк, сога коьре, боьтен де куьшли оьзимиздинъ аьлигимиз эм келеектегимиз уьшин каьр шекпеге тийислимиз, – деген шакырув этти ол.
Кардаш-тувганлары эм оьзининъ атыннан район администрациясына, шарага йыйылганларга эм Кадриядынъ оьнерин баалаган баьрине де разылык соьзлерин шаир-кыздынъ аданасы Султан Темирбулатов айтты. Солай ок Кадриядынъ синълиси Софья Язлыбаевадынъ уныгы Камила ятлав окыды.
Россия куьнине багысланган шарада Россия Федерациясынынъ яс гражданларына, 14 ясына еткен, окувында уьстинликлерге етискен окувшыларга паспортларды Ногай районы бойынша Россия ОМВД-сынынъ полиция начальниги Исламбек Янполов тапшырды.
Кадрия атындагы янъы паркынынъ эсигининъ алдындагы кызыл лентады кеспеге ыхтыяр Мухтарбий Аджековка, Мурат Мамаевке, «Дагестаннынъ яны» баргысынынъ лауреаты Роза Колебаевага эм Камила Язлыбаевага берилди.
Энъ де биринши болып, бу куьн янъы паркка районымыздынъ келеектегиси, балалар кирдилер. Кишкей яшавшылар уьшин мунда «Трезвая Россия» Федераллык проектининъ етекшиси Султан Хамзаевтен заманга келисли воркаут-майдан ярастырылган. Паркта ярасык ярыклар, олтыргышлар салынган.
Парктынъ ишиндеги йоллар ман юрип, коьнъиллери коьтерилген яшавшылар тоьгеректеги ярасыклыкка карап, боьтен де суьйиндилер. Олар яс тереклер олтырттылар, сонъ эстеликке суьвретлерге де туьстилер.
Шарадынъ шатлыклы кезегиннен сонъ байрам концерти озгарылды, сонда Ногай патшалык саз алатлар оркестрининъ, «Айланай» патшалык ансамблининъ артистлери, солай ок «Шынъ» эм «Карлыгаш» балалар ансамбльлерининъ катнасувшылары ортакшылык эттилер. Бу куьнги шарады Гюльгерен Савкатова юритти.
Яркын юлдыз болып янып, яслай соьнген зейинли ногай шаири Кадриядынъ аты берилген янъы паркта эсли, юзйыллык тереклердинъ салкынлыгында бу куьн биринши болып кирген балалардынъ немерелери тыншайган куьнлерди Кудай берсин.
Н.Кожаева.
Суьвретлерде: шарадан коьринислер.
