Янъыларда Москва каласында ногайлардынъ спорт бойынша ярык эм коьптен саклаган оьзгерис – 2021-нши йылдынъ Ногай футбол лигасынынъ финал кезеги басланды. Спорттынъ эм яшавдынъ савлык кебин яйылдырув, футболды оьрлендируьв, ногай яслардынъ арасында регионлар ара байланысты беркитуьв, баска болып сондай шараларды озгарув йолы ман дуныяда яшайтаган ногайлардынъ савлайын да бирлестируьв – сол турнирдинъ бас мырады эди. Спорттынъ футбол кеби – ол дуныя юзинде энъ де белгили ойынлардынъ бириси деп саналады. Ер юзинде 1,8 миллион командалары бар эм оларда 250 миллионнан артык аьдем ойнайды деп белгили. Ногай футбол лигасынынъ финал кезегинде туьрли регионларда яшайтаган ногайлардан туьзилген 12 командалар ортакшылык эттилер.

Айтпага, Карашай-Шеркеш, Дагестан Республикаларыннан, Ставрополь крайыннан, Астрахань областиннен, ХМАО- Юградан, ЯНАО-да яшайтаган ногайлардан туьзилген командалар, спорт ветеранлары, спорт специалистлери эм волонтерлар, савлайы 170 аьдем ортакшылык эттилер. Турнирде биринши кере ортакшылык эткен Астрахань областиннен Растопуловка эм Дагестаннынъ Бабаюрт районынынъ Геметюбе авылларыннан командаларынынъ катнасувшыларын айырым белгилев керек.
Ногай футбол лигасында йогары билимли тоьрешилер куьби аьрекетли куллык этти. Баьри ойынлар да YouTube эм Doslar.tv.-да кеспилик онлайн кебинде коьрсетилдилер.
Катнасувшылар алдында Сырт Кавказ Федераллык округындагы РФ муфтийлерининъ дин управлениесининъ председателининъ толы ыхтыярлы ваькили Р.Акказиев, ямагат эм политикалык аьрекетшиси М.Заргишиев эм ясуьйкенимиз, РФ ат казанган врачы С.Арсланбеков хошлав соьзин айттылар. Сыйлы ясуьйкенлер турнир катнасувшыларына уьйкен разылыгын билдирдилер, эм, буьгуьн озгарылатаган ярысларда кайсы команда биринши орында болаягы маьнели тувыл, бас орында биз бирге элимиздинъ туьрли регионларыннан йыйылганымыз эм ниетимиз бир болганы маьнели, дедилер.
Турнирдинъ тамамы бойынша Кара-шай-Шеркеш Республикасынынъ Ногай районыннан «Шаьбден» деген командасы 2021-нши йылдынъ Ногай футбол лигасынынъ Чемпионы болып шыкты.
Айтып озайык, турнир авыр эпидемиологиялык аьли мен байланыста санитарлык амалларын тутувы ман бас каламыз Москвадынъ аькимбасынынъ указы эм Москва каласы бойынша Роспотребнадзордынъ карары ман келисте озгарылды. Ногай футбол лигасы 2015- нши йылда Москва каласындагы Ногай ямагаты организациясынынъ ойы ман туьзилип эм озгарылып келеди. Sandyk.biz.деген биринши ногай Интернет-туькени Ногай футбол лигасынынъ официаллык спонсоры болады.
Рахим Тангатаров.
Суьвретте: шарадан коьринис.