Уьндирикте – янъы китап_____________

Язганлары ман халк юрегине ететаган белгили ногай шаир, язувшы Магомет Кожаевтинъ Махачкалада, «Наьсип эрте туратаган эди» деп аталып, янъы китаби баспадан шыккан. Китапке язувшыдынъ балалык шагы эм школада окыган йыллары акында, сол заманда яшаган аьдемлер, олардынъ келпетлери, хасиетлери, бактылары акында хабарланатаган «Наьсип эрте туратаган эди» деген повести ерлескен.

Оьзининъ повестинде М.Кожаев Ногай шоьлдеги авылында 60-ншы-70-нши йыллардагы яшавды, авылдасларын, тенъ-досларын, ювык аьдемлерин, кыскасыннан айтканда, замандасларын аян коьрсетеди. Язувшыдынъ «Наьсип эрте туратаган эди» деген повести «Шоьл тавысы» газетасында, «Бал татыган аьсерде» деп аталып, узак заман номерден-номерге шыгып турган.

Солай ок китапке М.Кожаевтинъ коьплеген хабарлары, адабиат критикалык макалалары киргенлер.

Оьзининъ шыгармалары ман эслидинъ де, ястынъ да эсин бийлейтаган, биревди де парахат калдырмайтаган, ойландыратаган эм яндыратаган язувшы Магомет Кожаевтинъ янъы китаби коьплерди кызыксындырар деп сенемиз.

М-А. Ханов.