Ногай районнынъ оьрметли ясуьйкенлери, эсли аьдемлери, ис ветеранлары!

Сизди таза юректен Эсли аьдемлер куьни мен – каьмбилликтинъ эм яхшылыктынъ байрамы ман кутлайман!

Бу байрам – заманлардынъ эм несиллердинъ айырылмас байланысы акында эске салмага, бизим районымыздынъ оьрленуьвине уьлисин коскан баьри де эсли аьдемлерге, олардынъ коьпйыллык намыслы иси уьшин йылы соьзлер айтпага бек ийги амал.
Сизинъ аьр биринъиз, ол кайсы ерде – авыл хозяйствосында яде мектебте, больницада яде курылыста ислесе де, районымыздынъ, республикадынъ савлайы уьйкен элимиздинъ ортак етимислерине оьз косымын эткен. Сизинъ ийинлеринъиз артында коьп онйыллык кайратлы куллыклар эм данъклы ислер тизилгенлер. Сизинъ белсенли катнасувынъыз аркасы ман биз эстеликлер эм мемориаллык такталар ашамыз, патриотизм сезимин оьсип келеяткан яс несиллерде тербиялаймыз, бизим тарих эм ян-маданият байлыкларымызды сакламага шалысамыз.
Авыр согыс йыллардынъ кыйынлыгын оьткерген, Тувган Элимиздинъ бойсынмаслыгын яклаган, патшалыгымызды кайтадан аягына тургызган согыс балаларына айырым разылыгымызды билдиремиз.
Сизинъ баьринъизди де: ким буьгуьнлерде уьйлеринде тийисли тыншаювында яде эсли ясына да карамастан, ис орынларында болганларды кутлайман. Сиз эндиги де ян-коьнъилинъиз бен яс кебинъизде эм оьзинъиздинъ белсенли яшав орынынъызды йоймайсыз. Сиз аьли де бизим сырамызда эм баьри де ийги ислердинъ басында турасыз, районнынъ ямагат-политикалык эм маданият яшавында дайым да ортакшылык этесиз.
Аявлы пенсионерлер эм ис ветеранлары! Наьсипли эм узак яшав оьмири сизге! Оьз балаларынъыздынъ эм уныкларынъыздынъ етимислерине суьйининъиз! Сизинъ яшаган йылларынъыз сиз уьшин оьктемликтинъ, тоьгеректегилерге каьмбилликтинъ эм яшав сулыбынынъ белгиси болсын. Сизди аьр заманда да ювык аьдемлеринъиздинъ сиз акынъызда каьр шегуьви эм суьйимлиги йылытсын!
М.Аджеков,
«Ногайский район» МР администрациясынынъ аькимбасы.