Республика бойынша уйгынланган 383 эсаплав участокларынынъ 4-ви Ногай районынынъ Терекли-Мектеб, Куьнбатар, Карагас эм Червленные Буруны авылларында ашылдылар. Соларда баьриси тавыславда 1500-ден артык сайлавшылар катнастылар.

Тавыслав бюллетеньлеринде «Единая Россия» партиясыннан РФ Федераллык Йыйынынынъ Государстволык Думасына сайланаяк кандидатлар ман ДР Халк Йыйынына айырылаяк кандидатлар сыралары белгиленген эди.
Районнынъ эсаплав участокларында тавыслав рахатлы, тийисли йорыгы ман оьтти демеге болады: эртеннен алып соларга аьдемлер аьеллери, авылдаслары эм ис йолдаслары ман келип турдылар.
Баьриси районга праймериздинъ уьш категориялары бойынша 4 мынънан артык бюллетеньлер аькелинген деп билдирди «Единая Россия» партиясынынъ Ногай район бойынша боьлигининъ толтырувшы директоры Яхъя Караев. Район яшавшыларынынъ хыйлысы Госуслуги сайтында онлайн йорыгында тавысларын бердилер.
Район орталыгы Терекли-Мектебте тавыслав район халк яратувшылыгынынъ орталыгынынъ меканында (алдынгы РДК) оьткерилди. Мунда сол куьн 500-ден артык аьдемлер тавыславда катнасканлар.
– Ногай районында болып оьткен тавыславда сайлавшылардынъ 100 проценти катнасты демеге болады, – деп билдирген Яхъя Караев. – Баьри де 4 эсаплав участокларында тавыслав тийисли йорыгы ман бузувларсыз оьткерилди. Район яшавшылары куьнибурын уйгынланган тавыславда йогары белсенлик коьрсеттилер