25-нши увыт куьнинде Ногай район администрациясында янъы коронавирус юкпалы маразын аянлав эм сонынъ яйылувынынъ алдын шалув бойынша район Оперативли штабынынъ кезекли йыйыны болып оьткен.
Шарада авыл администрацияларынынъ аькимбаслары, республикалык эм район учреждениелерининъ эм организацияларынынъ етекшилери, коьлем информация амалларынынъ ваькиллери катнастылар.
Йыйынды район Оперативли штабынынъ етекшиси, Ногай район администрациясынынъ аькимбасы Мухтарбий Аджеков ашты эм юритти. Ол йыйылганларга Дагестан Аькимбасынынъ кесек заманга куллыгын юритуьвши Сергей Меликов ызгы республикалык Оперативли штабынынъ йыйынында, элимиздинъ баска регионлары ман тенълестиргенде, республикада янъы коронавирус юкпалы маразына карсы юритилетаган ийне урдырув исининъ тоьмен оьлшемин айтып белгилегенин билдирди.
Мухтарбий Аджековтынъ соьзлерине коьре, Ногай районы Дагестанда COVID-19 маразы ман авырув бойынша биринши орынды алады. Ол район активин ийне урдырув исинде бас деп оьзлери катнасып, оьз коллективлерине коьрим коьрсетпеге шакырды. Район етекшиси тек соьйтип биз оьзимизди эм оьз ювыкларымызды аман сакламага болаягымызды белгиледи. «Биз не шаклы кардаш-тувганларымызды былтыр йойганымызды эм быйыл да йойып турганымызды эсимизге алайык. Сонынъ уьшин аьр ким де маразга карсы ийне суктырувды оьзиннен басламага тийисли», – деди ол.
Онынъ соьзин, солай ок район администрациясынынъ аькимбасынынъ орынбасары Баймагомед Ярлыкапов та йоьпледи. Ол йыйылганларга республикадынъ Оперативли штабынынъ оьткен ызгы йыйынында биз аьлиги заманда коронавируска карсы тутып турган йорыкты, регион яшавшыларынынъ хыйлысы вакцинацияды оьтпей турып, осаллатпага керек тувыл экенимиз акында карар кабыл этилингенин билдирди.
«Бизим россия вакцинамыз бу куьнлерде коронавируска карсы дуныяда энъ де ийги вакцина деп саналады. Ол алдын биз гриппке карсы урдыратаган вакцинадай, соннан бир зарар да болмайды, сонынъ акында аьли коронавируска карсы вакцинады оьзлерине урдырган аьдемлер де шайытлайдылар», – деп белгиледи Баймагомед Ярлыкапов. Онынъ айтувы ман, быйыл коькек айында COVID-19 маразы ман байланыслы эпидемиологиялык аьллер тагы да осалланмага болады, сол саялы заманында юкпалы маразга карсы ийне урдырмага алгасав керегеди.
Йыйында Ногай ЦРБ бас врачы Фаризат Межитова да шыгып соьйледи. Ол былтыр янъы коронавирус юкпалы маразы ман байланыста район бойынша 6 мынънан артык аьдемлер тергев оьткенин, солардынъ 52 процентинде авырув аянланганын белгиледи. Быйылдынъ оьткен 2 айы ишинде сондай авырув табылган аьдемлер саны 11 процентке етискен. Соны ман бирге, район бас врачынынъ айтувы ман, бу юкпалы мараздан тура район еринде оьлим де йогары оьлшемде экени эсапка алынган. «Быйылдынъ канътар-увыт айлары ишинде район бойынша коронавирус юкпалы маразыннан 28 аьдем оьлген. Булай караганда авырыган аьдемлер саны аз болып коьринеди, ама оьлетаган аьдемлер саны коьп. Аьли вакцина урдырмага энъ де онъайлы шак, неге десе коькек айына дейим заман бар. Тек мараздынъ яйылувы тагы да оьсип баслагандай болса, биз биревимиз де уьлгирип болмаякпыз: сиз, гражданлар, вакцина урдырмага, биз, врачлар, сол шаклы авырувларды эмлемеге», – деди Фаризат Межитова.
Район эмлев учреждениесининъ етекшиси, солай ок Ногай районы бойынша Россия МВД боьлигининъ начальниги Наиб Каракаевке вакцина урдырмага келгени эм оьзи мен бирге коллективин де аькелгени уьшин разылыгын билдирди. Фаризат Межитовадынъ айтувы ман, район полиция куллыкшылары былтыр пандемия басланганнан алып белсенли куллык этедилер, аьдемлерге маска киймеге эм байыр кавыфсызлык йорыгын тутпага кереги акында анълатув исин сахый юритедилер.
Шарада солай ок «Шоьл тавысы» республикалык газетасынынъ бас редакторы Эльмира Кожаева да шыгып соьйледи эм район активин янъы коронавирус юкпалы маразына карсы биргелесип ислемеге эм аьр бир район яшавшысына вакцина урдырув керекли экенин анълатпага шакырды.
Йыйыннынъ тамамында район еринде маразга карсы яшавшыларга вакцина урдырув исин белсенлетуьв бойынша куллыкты кенъейтуьв акында карар алынды.
М.Юнусов.
