Оьткен дуьйсемби куьн район администрациясында кезекли йыйын болып озды. Онда район еринде быйылгы 10 айлар ишинде оьткерилген курылыс ислер акында билдируьв мен «Ногайский район» МР администрациясынынъ «ОКС» МКУ директоры Арслан Тангатаров шыгып соьйледи.

Онынъ соьзлери мен, Миллет проектлер яшавга шыгарылув ман байланыста республика еринде социаллык маьнелиги болган коьп объектлер курылады, эм Ногай районы сол проектлерди яшавга шыгарувда белсен ортакшылык этеди.
Бизим боьлик муниципаллык заказчиктинъ борышларын толтырады. Район еринде коьп объектлер курылады, эм биз баьринде де заказчиклер болмасак та, биз проектлик документация туьзуьвге борышларды кеплеймиз, капиталлык курылыс объектлерди кулланувга беруьв мен байланыслы токтасларды кабыл этип алувда ортакшылык этемиз, – деди Арслан Тангатаров.
Быйыл ерли бюджет амалларына «Точка роста» программасы бойынша районнынъ билимлендируьв тармагында Кара-Су, Калинин, Нариман авылларынынъ мектеблеринде ремонт ислери озгарылган эм баьри онъайлыклар туьзилген. Класс боьлмелерининъ ишинде ярастырув куллыклар этилинди, олар исси эм сувык сув ман канагатланды, канализация этилген. Бу баьри ислердинъ баасы – 2 млн.маьнет акшадан артык. Солай ок «100 мектеблер» программасы бойынша Эдиге эм Ленинаул мектеблеринде 5 млн. маьнет акшага ярастырув ремонт ислери этилинди. Эдиге авылында мектеб ярыкландырылган, пищеблок ремонтланган.
Ленин авылында терезе блоклар авыстырылган, пищеблок ремонтланган, йылы аяк йол меканын курув бойынша куллыклар этилинген. «Ерли бюджет амалларына Куьнбатар авылында « Карлыгашлар» балалар бавында 600 мынъ маьнеттинъ ремонт ислери этилинген, Батыр-Мурза авылында 100 орынга эсапланган мектеб курылысы басланган. Бу объект баасы – 178 млн. маьнет акша. Карагас авыл мектебининъ спортзалында капиталлык ремонт ислери юритиледи. Быйыл Шуьмлелик эм Кумлы авылларында янъы мектеблер салув планланады, Терекли-Мектеб авылында 700 орынга эсапланган мектеб меканын салувга аьзирлик коьриледи. Солай ок бу куьнлерде Карагас эм Червленные Буруны авыл мектеблерининъ пищеблокларынынъ ремонтына сметалык документация аьзирленеди», – деп белгиледи районнынъ ОКС боьлигининъ басшысы.
Сонъ Арслан Тангатаров район еринде автойоллардынъ ремонты акында айтты. Онынъ соьзлерине коьре, йол амаллар фондыннан Терекли-Мектеб авыл ишиндеги йоллары ремонтланган: Крупская, Чайковский, Аджиков, 50 лет Октября, Муртазаев, Комсомольская, Молодёжная, 50 лет Дагестана, Заргишиев, Ажманбетов орамларында – 3,6 млн. маьнет акшага. Буьгуьнге районнынъ баска авыллары бойынша олар ишиндеги йолларды ремонтлавга (8,4 млн. маьнет акша эсабында) подрядчикти белгилев бойынша конкурс тамамланган. «Ногай Эл» балалар бавы алды ярастырылган.

«Меним Дагестаным – меним йолларым» республикалык программасы бойынша район орталыгынынъ Эсмуханбетов, Кокоев,Озёрная, Яхъяев орамларына асфальт тоьсев исин этуьвге подрядчикти белгилевге аукцион озгарылувы тамамланув дережесинде (сметалык баасы – 7 млн. маьнет акша).
Бу аукцион бойынша бизде кайбир маьселелер орын тапты. Айырым материаллардынъ баалары бирденнен оьскен мен байланыста объект курылысы дайым да келимли болып болмайды. Соны ман байланыста биз Терекли-Мектеб авылындагы йолларга асфальт тоьсевге экинши кере конкурс оьткерилетаганы акында билдируьв эттик, аьли уьшин бирев де заявка бергени йок. Район аькимбасы М.Аджековтынъ тапшырмасы бойынша Терекли-Мектеб авылында алдынгы май-пыслак болдырувшы заводыннан алып «Буйрат» туькенине дейим, автостанциядан Муртазаев орамы бойынша Кумлы авылга карап йоллар карысатаган ерге дейим асфальт тоьсев куллыкларын озгарувга проект-сметалык документациясын аьзирлеймиз.
«Кавыфсыз эм онъайтлы йоллар» деген программа бойынша ДР коьлик эм йол хозяйство Министерствосы ман Кизляр – Терекли-Мектеб республикалык автойолынынъ 30-40 шакырым кадериндей кесегине 122 млн. маьнет акшага эки кабатлы асфальт-бетон тоьселген. Аьлиги заманда Терекли-Мектеб авылынынъ айлангыш йолына 59 млн. маьнет акшага асфальт-бетон йолын тоьсев мен капиталлык ремонт ислери юреди. Быйыл сол амаллардынъ 40 проценти яшавга шыгарылмага планланады, – деп билдирди учреждение директоры.
«Маданият» миллет программасы бойынша районнынъ капиталлык курылыс боьлиги мен Куьнбатар авылында 300 орынлы маданият уьйининъ курылысы барады ( баасы – 30 млн. маьнет акша). Бу ислердинь заказчиги – ОКС. Быйылдынъ 25-нши декабрине объект кулланувга берилмеге планланады, оны ярастырып салувга косымша келисуьв беркитилген.
Быйыл ДР маданият министерствосы оьз амалларына халк саз алатлар оркестрининъ меканын ремонтлады, «Айланай» эм драмтеатр ерин коралады. Эндиги йыл музей меканын ремонтлав планланады.
Арслан Тангатаров солай ок районда спорт объектлер курылысы акында айтты. Аьлиги заманда Карагас авылында киши футбол (волейбол майданлы), стадионынынъ (баасы – 10,5 млн. маьнет акша) курылысы барады. Оларды курувга проект-сметалык документация эм экспертиза аьзир этилинген. Нариман авылында киши футбол бойынша стадион салувга подрядчик белгиленген. Сол ок заман Червленные Буруны эм Куьнбатар авылларында сондай стадионлар салувга проект-сметалык документация аьзирленеди.
Биз бен орталык стадионнынъ реконструкциясын проектлевге борыш белгиленген. Проекттинь баасы – 47 млн. маьнет акша. Экономика министерствосы ман келисилген, – деди районнынъ ОКС басшысы.
Соьз бардырылды районымыздынъ айырым яшавшылар пунктларынынь газификациясы акында да. А.Тангатаровтынъ айтувы ман, Куьнбатар авыл ишин газ бан канагатлав сетьлерине экспертиза озгарылган эм аьли ол – подрядчик белгилев вакытында. Объекттинъ сметалык баасы – 47 млн. маьнет акша.
Сылув-Тоьбе авылында газопровод трубалары тартылып басланган. Проекттинъ баасы – 2.8 млн. маьнет акша. Уьйсалган авылын газификациялав бойынша республикадынъ «Спецгазстройсервис» деп, газ бан канагатлав бойынша бирдей заказчиктинъ дирекциясы ман соьйлесуьвлер юреди, – деп билдирди докладшы.
Ногай районынынъ куьндегилик маьселелерининъ бириси – яшавшыларды сув ман канагатлав. Быйыл Орта-Тоьбе авылында артскважина казылып басланган, Карагас авылында артскважина казувга подрядчик белгиленген. Эндиги йыл 9 артскважиналар казув планланады, ортак баасы – 100 млн. маьнеттен артык акша. Солай ок Терекли-Мектеб авылында сув бургыларын ярастырувга проект-сметалык документация аьзирленеди.
– Быйыл Ногай районында озгарылатаган ислер 315 млн. маьнет акшадан артыкка олтырады, а келеектеги йылда уьш авылда тек бир мектеб курылысынынъ баасы 1 миллиард маьнет акшага олтыраяк. Бизим Ногай районында кайдай программа яде проект бойынша объект курылса да, курылаяткан объектте ким подрядчик болса да – ОКС, мектеблер яде тийисли министерстволар – бу баьри зат район етекшилигининъ, сонынъ ишинде капиталлык курылыс боьлигининъ, ис сырагылары, – деп белгиледи Арслан Тангатаров, оьз соьзин тамамлай берип.
Бизим хабаршы.