Хатерсиз кара катединъ сырагысында оьнери мен ногайдынъ йыр оьрисинде эркин карагустай оьрген, шагында шанъ шыгарган йыршы йигитимиз – Алибий Кубий увылы Романовтынъ юрек согувы замансыз эм аявсыз уьзилди…Тувган Ногай шоьллигимиз, дуныядагы буьтин ногай халкымыз, миллет маданиятымыз эпсиз уьйкен эм толыстыргысыз йойымга йолыкты. Алибий Кубий увылы халк йыр эм анъ дуныясынынъ коькке коьтерилген, коьнъил байыткан бийиклигининъ бириси эди.
Ортак халк кайгымыздынъ оьлшеми акында газетамыздынъ редакциясына оьткен куьнлерде ногайлар яшайтаган баьри ерлерден келген эм эндиги де келип турган кайгырувлар шайытлайды. Соларды газетамыздынъ бу номерининъ 3-нши бетинде баспалаймыз.

«Ногайский район» МР администрациясы эм оьзимнинъ атымнан ата юртымыз Ногай шоьллигининъ, сав дуныядагы ногай халкымыздынъ алал увылы, миллетимиздинъ йыр оьнерин юлдызларга дейим коьтерген, юректи бийлеген бил-бил тавыслы Алибий Романовтынъ эм бизим алал ис йолдасымыз, билимли, сабыр, танъ юрекли Алимакка Ганиевтинъ замансыз дуныядан таювлары ман байланыста каты кайгырувымызды билдиремен.
Биз дайым да тири эр янлы, йылы коьнъилли, эл ишинде суьйикли йигитлеримизди йойдык. Алибий Романов кайсы ерде де халкымыздынъ атын бийик сыдыралы соьзлер мен айттырып билген. Онынъ домбырасында бурынгы шоьлдинъ яны сакланып, Алибийдинъ аьлемет ийги тавысы ман бирге ясуьйкенлеримиздинъ, бизим эм оьсип келеяткан яслардынъ коьнъиллеринде оьлимсиз яркын миллет сезимлеримизди тувдырган. Ол бизге тувган еримизди, халкымыздынъ юзйыллыклардан оьтип келген оьнерин артык суьйдирип уьйретти.
Алибий Романовтынъ эм Алимакка Ганиевтинъ аьеллерининъ, олардынъ кардаш-тувганларынынъ, сав Куьнбатар авылынынъ, буьтин ногай халкымыздынъ уьйкен авыр кайгысын боьлисемиз, баьрисине де эмишликти, бассавлыкты йораймыз.
М.Аджеков, «Ногайский район» МР администрациясынынъ аькимбасы.