Дагестаннынъ Ногай районында уьш куьн узагында бас режиссер Родион Исмаиловтынъ етекшилиги астында «Тиллер тавы» деген документальлик кинофильм алынды.

Бас деп бу яратувшылык туьркимин муниципалитет администрациясы йолыкты. Мунда муниципалитет аькимбасынынъ ис борышларын толтырувшы Хамидулла Саитов келген конакларды хош коьрип алды эм оларга уьстинликли яратувшылык аьрекетин йорады.
Проект етекшиси Р.Исмаилов фильмде Дагестан еринде яшайтаган баьри халклар, олардынъ аьдет-йорыклары, солай ок республика яшавшыларынынъ кызыклы хабарлары орын табаягы, келеекте фильм калай болаягы акында айтты.
«Тиллер тавы» проекти – ол Россиядынъ кубыла шетинде орынласкан регион акында тек кезекли фильм тувыл, ол – оьз аьдет-йорыкларын тутатаган, оьзининъ аьвелгисин сыйлайтаган коьп миллетли Дагестан Республикасы акында алынган уьйкен оьлшемли кинофильм.
– «Тиллер тавы» фильм – 12 ай ишинде 200-ден артык яшавшылар пунктларында алынаяк уьйкен кинопроект, – деп белгиленеди фильмнинъ келеектегиси акында синопсисте.
– Ногай районында кинофильм туьзуьв уьшин Калининаул, Карагас, Кумлы, Нариман, Карасу эм Куьнбатар авыллары сайланып алындылар. Кинофильмди алувда авыл яшавшылары, солай ок «Айланай» Оькимет фольклор-этнографиялык ансамблининъ артистлери ортакшылык эттилер. Сенемиз, Ногай районыннан фильмнинъ ярасыклыгы эсабында ыспайы кумлаклар пейзажы, боьригоьз шешекейли кырлар эм шет-кыйырсыз шоьл табиатынынъ баска ярасыклы ерлери болар.
Ногай шоьлинде киноалувшылар туьркимининъ куллыгы бек толы эм кызыклы болганын белгилейди «Шоьл тавысы» республикалык газетасынынъ бас редакторы Эльмира Кожаева.
– Мен кеспили яратувшылык туьркимининъ аьрекетине коьз тасладым, проекттинъ бас режиссеры Родион Исмаилов аьр аьдем мен йылувлык пан айырым хабарласканы ман сукланмай болмадым. Мага бу наьсипли уьш куьнлер узагында савлай дуныяга аты белгили режиссер-документалист Родион Исмаиловта мастер-класс оьтпеге эп болды. Онынъ республикадынъ бир шетиннен баскасына кой эм тувар малын айдаган койшылар акында тек бир «Кочевье» деген фильмин карасанъ, оьз бактысына разылыгы ман оьзлерине сондай авыр ис аьрекетин алган танъ коьшпели халк акында ойланасынъ. Белгилев керек, бу фильм Китай, Италия эм Россия эллеринде оьткен савдуныялык кинофестивальлерде савгалы орынларга тийисли этилинген. Режиссердинъ ийги кинофильмлери акында билип, сенимлик пен айтаман, «Тиллер тавы» фильми келеекте, эш бир соьзсиз, савлай кинодокументалистикада тийисли орынын бийлеек, – деди ол.
Мастер оьзи дагестаншылардынъ йогары конаксуьерлигин, танълыгын эм юрек ашыклыгын белгиледи.
– Мен кинофильмди алувда ортакшылаган аьр дагестаншыга уьйкен разылык соьзлеримди каратаман олардынъ шыдамлыгы, куллыкларын калдырып келгенлери уьшин, неге десе куллык бир неше саьатлер узагында юритилди, ортакшылаган яшавшыларга кинокамералар алдында соьйлемеге де енъил болмаган деп ойлайман, – деп белгиледи Родион Исмаилов.
Бу яратувшылык туьркимининъ кинофильмлер алув аьрекети эндигиси Кумторкала районында эм Махачкала каласында оьтеек.
Бизим хабаршы.
Суьвретте: режиссер Р.Исмаилов.