Ногай районынынъ балалар бавларында патриотлык тербиялавга уьйкен маьне бериледи. Районымыздынъ келеектегиси, онынъ аьлиги кишкей яшавшылары – балаларда тувган ерине, республикасына эм Элине суьйим эндирер ниетте туьрли шаралар уйгынланадылар.
Дагестан халкларынынъ бирлик куьнине багысланып, янъыларда «Ногай Эл» балалар бавында байрам озгарылды. Шарага деп мунда байрам залы бек ярасык безекленген: Дагестан халкларынынъ туьрли зияпетлери айырым сыпыраларга тизилген, бурын заманда уьйшиликте кулланылган алатлар да салынган, хатынлардынъ явлыклары эм ярасык суьвретлер илинген, энъ де коьрнекли ерде Россия эм Дагестан байраклары ярасыкланып турылар. Балалар бавынынъ тербияланувшылары да куьплерге боьлинип, республикамызда яшаган миллетлер кийимин кийгенлер. Бу баьри зат байрамда болган аьдемди савлай Дагестаннынъ туьрли муьйислеринде бир кишкей кесек заман ишинде болып шыккандай этип сездиреди.
Байрам Дагестан Республикасынынъ гимни мен ашылды. Балалар оны, тербиялавшылардынъ уьйретуьви мен, олтырган ериннен турып тынъладылар. Сонъ шара юритуьвшилери «Ногай Эл» балалар бавынынъ тербиялавшылары Джамиля Аманбаева эм Камиля Айтувганова бу куьнги байрам, дагестан халкларынынъ татымлыгы, олар коьп йыллардан бери бир-бирине тирев эм коьмекши болып келгенлери акында кызыклы хабарладылар. Оннан сонъ киши куьптинъ балалары ятлавлар яттан айттылар. Уьйкен куьплердинъ балаларына Россия эм Дагестан герблерин кагыт кесеклериннен йыйнамага борыш берилди. Солай ок бу куьн балалар оьз куьшлерин туьрли ойынлар аркалы сынадылар. Олар ортага шыгып, аркан тартув ойынында базластылар. Оннан оьзгелей, балалар бурын заманда ата-бабалары ойнаган табан-тирес ойынын да эсине салдылар. Ойынлар ойнап, балалар «лезгинка» биювине коьштилер. Олардынъ карс кагып биювин, миллет кийимлери боьтен де ярасыклы этти. Байрам сонъында «Ногай Эл» балалар бавынынъ етекшиси Наида Юнусова Дагестан халклары бир аьелдей болып коьп йыллардан бери татымлыкта яшайтаганын айтты. Ол тербияланувшыларды аьр дайым да баьри миллет балалары ман татым болмага шакырды. «Ногай Эл» балалар бавындагы коьнъил коьтерилис аьлде оьткен байрам, балалардынъ эсинде эм согылган суьвретлерде сакланар.
Н.Кожаева.
Суьвретлерде: «Ногай Эл» балалар бавында.
