Конъысы Шешен Республикасынынъ Шелков районынынъ Сары-Сув авыл орта мектебининъ окувшысы, яс ногай спортсмени Арсен Мустафаев янъыларда Турция элинде тайский бокс бойынша яслар арасында оьткерилген Европа чемпионатында катнасып, енъуьвши орынды бийлеген. Ога чемпионаттынъ алтын медали тапшырылган.

Арсенди Турциядан кайтканда тек тувган мектеби тувыл, сав авылы уьйкен куваныш пан йолыкканлар эм ога коьп мактав эм разылык соьзлерин айтканлар.
Арсен Мустафаев аьли тек 16 ясында, авыл мектебининъ 10-ншы классында окыйды. Ол эм онынъ кишкей иниси Амир ызгы йылларда оьз районында, республикада, Дагестанда оьткерилетаган ярысларда ортакшылык этип, алдышы орынларды казанып келедилер.
Арсенге берк ден савлыкты, алдыда тагы да коьп уьйкен спорт етимислерди йораймыз.

М.Юнусов.
Суьвретте: Арсен Мустафаев – Европа чемпионы.