Янъыларда Расул Гамзатов атындагы Дагестан миллет китапханасында «PROдвижение» деген республика бойынша ярысынынъ тамамы келтирилди. 30 ясындагы дагестаншылар ярыстынъ катнасувшылары болдылар.

Шарады аша келип, Дагестаннынъ яслар ислери бойынша министри Камил Саидов ярыс катнасувшыларын хош алып, етискенлеринде токтамай, оьз куьшлерин округ эм федераллык программалары бойынша сынамага шакырды. Ярыс, айтпага, «Молодежный медиапроект», «Лучший сюжет о молодежном мероприятии», «Большой материал» эм «Новые медиа» деген доьрт номинациялары бойынша оьтти.
Ярыс тамамы бойынша «Молодежный медиапроект» номинациясында Магомед Омаров, «Лучший сюжет о молодежном мероприятии» деген номинациясында Дина Балгишиева, «Большой материал» номинациясында Эмир Отевалиев, «Новые медиа» – Аминат Магомедова енъуьвши деп белгилендилер. Енъуьвшилер 100, 70, 50 эм 30 мынъ маьнет акшалы сертификатларынынъ иелери болдылар.
Эмир Отевалиев «Чемпионнынъ йолы» деген олимпиада чемпионы Альберт Батыргазиевтинъ акында туьзилген фильми уьшин «Большой материал» деген номинациясында энъ ийги автор деп белгиленген. Ол сол бийик етимиси уьшин 100 мынъ маьнет акшалы сертификатына тийисли этилди.
«Шоьл тавысы» газетасынынъ редакциясы Ногай район администрациясынынъ пресс-службасы Эмир Отевалиевти ярыста енъуьвши болувы ман кутлайды эм келеекте де ога бийик яратувшылык етимислерин йорайды.
Суьвретте: ярыс енъуьвшиси Эмир Отевалиев Дагестаннынъ яслар ислери бойынша министри Камил Саидов пан.