Россия спортынынъ бокс бойынша мастери, йогары класс куьресуьвшиси Рашид Янгазиев енъуьвге тиресуьвли ымтылыслыгы ман, тиресуьвли иси мен яс спортсменлерине коьрим эм тийисли уьлги болып келеди. Ногай яс туьрли дережели ярысларда тиресуьвли ортакшылык этуьви мен енъуьвши орынларына тийисли болып, халкымыздынъ атын айттырып келеди. Айтпага, тек янъыларда йигитимиз бокс бойынша Россия чемпионатында катнасып, енъуьвшилердинъ сырасын толтырды.

63,5 килограмм шеккиси мен ногай ясымыз Рашид Янгазиев бокстынъ финал кезегинде Санкт-Петербург каласыннан спортсмени мен Чита каласында кырк кийик айынынъ 29-ншы куьниннен алып, казан айынынъ 9-ншы куьнинлерине дейим оьткен турнирде куьресип енъуьвши болып шыкты. Соьйтип ердесимиз, Ногай районынынъ Куьнбатар авылынынъ яшавшысы Рашид Янгазиев Россия чемпионатынынъ ез призеры эм 125 мынъ маьнет акшалай сертификат иеси болып енъуьвшилердинъ санына кирди.
Янъыларда яс спортсменимиздинъ яшавында тагы да ийги эм маьнели оьзгерис болды. Рашид Янгазиев бир неше етимисли куьреслериннен сонъ Россиядынъ Олимпиада йыйылыс командасынынъ агзасы болды.
«Аьр бир спортсмен спортта энъ йогары тамамына етиспеге суьеди, сол тамам – Олимпиада ойынлары. Олимпиада ойынлары – ол энъ йогары тамам эм бокс пан аьр бир кызыксынувшыга етиспеге керек бийиклик болады», – дейди суьйинишин ясырмай, оьзининъ етимиси акында айта келип яс спортсмен. Элбетте, сол коьрсетимге Рашидти коьп йыллар бойы оьз усталыгы бойынша куллык этуьви аькелди.
Рашидти сол бийик уьстинлигине етисуьви мен ак юректен кутлаймыз эм ога келеекте де бийик енъуьвлерди, йогары етимислерди сагынамыз эм Рашид, дайым алдыга! – деп айтамыз.
Г.Рамазанова.
Суьвретте: Рашид Янгазиев.