Аьр бир аьдемге яшав оьмири бойынша табиат пан айырым бир бакты савкатланады. Менимше, аьдем оьмирин аспандагы юлдыз бан да тенълестирмеге болады. Бар ша арамызда яркын юлдызга усаслы аьдемлер. Олай дегеним, ондайлар ян тоьрининъ ярыгын тоьгеректегилерине аямай савгалап, нурларын сепкендей болып, яшавды ийгилендиредилер, касындагыларынынъ коьнъиллигине коьнъил косып.
Сондай ашык юрекли, яшав куьезин сезип болатаган эм оьзи мен аьллеслиги болган баьрисининъ яшавын ярыкландыратаганлардынъ бириси – Калининаул яшавшысы Агарув Курган кызы Кулунчакова.
Буьгуьнлерде А.Курганова оьзининъ 70 йыллык мерекесин белгилейди. Оьткен оьмирдинъ орталарында энъген ол бу дуныяга, тоьркини, ата юрты онынъ – кенъ шоьлимиздинъ кубыла бетинде орынласкан Кумлы авылы. Мунда оьтти онынъ каьрсиз, завыклы бала шагы, мунда озгарды ол мектебте окыган йылларын. Ерли мектебтинъ 8 классын окып битирген сонъ, ол, окытувшы кесписин байырламага ниетленип, Хасавюрт каласындагы педучилищесине окымага туьседи. Оны битиргеннен сонъ, кеспи бойынша куллык этуьвге багыслайды оьз яшав оьмирин.
Ис йолы онынъ Ленинаул мектебинде басланган, байыр наьсибин де ол бу авылда тапты, татым аьелин курып. Ян косагы ман бирге ол доьрт балады асырап оьстирди, аьрисине уьйкен яшав йолында оьз сокпагын таппага себеплигин тийгистти, суьйген кеспилер иелери болувга демевлигин этти. А оьзи болса, окытувшылык аьрекетине оьзининъ 43 йылын багыслап, Калининаул мектебинде баслангыш класслар окытувшысы болып кыйын салып, коьп йыллар бойынша коьплеген балаларга билимлер беруьв уьшин кыйынын аямады. Буьгуьнлерде олардынъ аьр бириси яшавда оьз орынын тавып, сайлаган кеспилери бойынша ис аьрекетин бардырадылар. Мутпайдылар олар билим йолы ман оларды алып барган, сайлаган суьйикли кесписине алаллыгы ман коьп йыллар бойы аьрекетлигин бардырган биринши окытувшысы Агарув Курган кызы Кулунчаковады. Буьгуьнлерде ол тийисли тыншаювда болса да, ерли мектебте тез-тез конак эсабында болады. Сыйлайдылар Агарув Курган кызын бирге ислеген йолдаслары да, онынъ колында билим дуныясы ман танысып, уьйкен яшав йолында оьз орынын тапкан окувшылары да.
Мен Агарув Курган кызы Кулунчаковады оьзимнинъ атымнан да, ерли мектебтинъ окытувшылар коллективиннен де сыйлы 70 йыллык мерекеси мен ак юректен кутлайман, берк ден савлыгын, узак яшав оьмирин, дайым да ийгиликлер йорайман.
С.Янгазиева,
Калининаул мектебининъ окытувшысы.
Суьвретте: А.Кулунчакова.
