2019-ншы йылдынъ караша айынынъ 15-18-нши куьнлеринде Туркия элининъ Анталья каласында V Халклар ара Ногай футбол лигасынынъ командалары арасында дуныялык чемпионаты уйгынланып оьтти. Кызыклы ярыста Россия, Германия, Румыния, Швеция, Нидерланды, Норвегия, Туркия эллериннен ногайлардан туьзилген командалары спорттынъ футбол кеби бойынша дуныя чемпионатында оьз куьшлери мен сынастылар.

Ойын барувы бойынша аьр бир команда тийисли оьлшемде аьзирленген эдилер. Россия ногайлары атыннан Савлайроссиялык Ногай футбол лигасында чемпион атына тийисли болган Карашай-Шеркеш Республикасынынъ Ногай районындагы Икон-Халк авылыннан «Шаьбден» деген командасы катнасты.

Ети эллерден келген ногай командалары арасында тиресуьвли эм кызувлы ойынынынъ тамамында Россиядан «Шаьбден» деген ногай командасы – 1-нши орынга, Румыния командасы – 2-нши орынга, Швеция командасы 3-нши орынга тийисли болдылар. Командалардынъ ойыны уьшин яны авырып карамага келгенлердинъ эм туьрли ердеги ногайларын коьрмеге деген мырат пан мынълаган шакырым йолды кыскартып барганлардынъ саны да аз тувыл эди. Тамамында баьри ногайлар да енъдилер, деп айтпага болады, неге десе оьткен чемпионатынынъ бас мырады туьрли ерлерде яшайтаган ногайларды бирлестируьв, бириктируьв эди. Европадан келген конаклары орыс тилин, Россиядан барганлар олардынъ патшалык тилин билмесе де, олар бир-бири мен ногай тилинде соьйлеп, уьш куьнлик йолыгысын кызыклы эм пайдалы озгардылар. Чемпионат ойыны тамамланган сонъ, ойынга деп йыйылган командаларынынъ катнасувшылары бирге эстеликке суьвретке де туьстилер. Оннан сонъ ойын катнасувшыларына ногай йырлавшылары Арсланбек Султанбековтынъ, Бегали Куруптурсуновтынъ, Зухра Булгаровадынъ катнасувы ман ногай тилинде концерт программасы уйгынланып оьтти.

Туркия элининъ Анталья каласында оьткен дуныялык чемпионаты, тек спорт футбол кебин яйылдырув мырады ман озгарылып калмай, ети эллериннен йыйылган ногайлардынъ танысувына, бир халк экенин яны ман, каны ман сезуьвине, кардашлык сезимин берк этуьвге коьпир салганына соьз йок.

Г.Нурдинова.