«Шоьл тавысы» республикалык газетасынынъ куллыкшылары коронавируслы юкпалы маразына карсы прививкады эттируьвден тура яшавшыларга берген соравга Кадрия атындагы орта мектебининъ окытувшысы Россита Карагулова явап береди. Онынъ айтувы ман ясуьйкен эм яс несиллерге шекленмей вакцинация оьтпеге керек.

– Коронавируслы маразынынъ яйылувын токтатувда аьр бир аьдем яваплы. Бу юкпалы маразынынъ авырлыгын биз билемиз эм шеккенмиз, сога коьре мен дурыс сайлав этпеге шакыраман.
Мен вакцинацияды оьткенмен. Бизге, окытувшыларга, аьр дайым да коьп аьдемлер мен аьллеспеге, ислемеге туьседи. Бизим исимиз тек балалар ман байланыслы болып калмайды, окувшылардынъ ата-аналары ман да тар байланыслы. Вакцинацияды оьтип, биз шекленмей, коронавируслы маразы юкпага болады деп тынышсызланмай, йыйынлар озгармага, окувшылардынъ уьйине бармага яде олардынъ ата-аналарын аьне яде муна соравдан тура мектебке шакырмага боламыз.
Вакцинацияды оьтуьв кыйын тувыл. Дерислер арасында мен поликлиникага бардым, мага шеретсиз прививкады урдылар. Вакцинацияды оьтуьв меним бир кишкей кесек заманымды алды, ама мен эндигиден алып куллыгымда да, ювыкларым арасында да рахатлы, тынышсызланмай ислеймен эм аьллесемен.
Мен окувшыларымнынъ ата-аналарын, аьли де вакцинация оьтпей, ойланып турган баьрин де, уьйкен эм яс несил ваькиллерин коронавируслы маразына карсы прививкады оьтпеге шакыраман, – дейди Россита Карагулова.