Ногай шоьллигимиздинъ яслары эм кызлары совет заманларыннан алып, уьйкен элимиздинъ кайсы ерлериндеги орта эм йогары окув ошакларына туьсип окып эм соларды уьстинлик пен кутарып келедилер. Каерде де халкымыздынъ яс ваькиллери оьзлерин тербиялы, билимли, аьр бир ягыннан ийги этип коьрсетпеге шалысадылар.

Айза Динисламова – 1999-ншы йылда Ногай районымыздынъ Кумлы авылында тувган. 2016-ншы йылда ол Терекли-Мектеб авылдынъ А.Джанибеков атындагы орта мектебин алтын медальге окып битирген эм сол йыл ок Россия МВД-нынъ Краснодардагы университетининъ полиция боьликлерине специалистлер аьзирлев бойынша факультетине окувга туьскен. Университетте окыган йылларында илми-ваькиллик эм туьрли конкурс шараларында, регионаллык, савлайроссиялык эм халклар ара конференцияларында белсенли катнаскан. Оьткен 2020-ншы йылдынъ сентябрь айында оьзининъ биринши офицер дережеси – полициядынъ киши лейтенанты юлдызын погонына орынластырган. Быйыл июль айында ол полиция лейтенанты офицер дережесин алып, университетти уьстинлик пен кутарган, «Ыхтыяр саклавшы аьрекети» деген кеспи бойынша специалитет программасын уьйренип алган. Патшалык сынавлар комиссиясынынъ карары ман Айзага юрист квалификациясы тапшырылган.
Быйылдынъ 28-нши июлиндеги Россия МВД-нынъ министрининъ 570-нши номерли «Россия МВД-нынъ айырым билимлендируьв организацияларынынъ выпускниклерин МВД тармагынынъ йогары билимлендируьв организациясын уьстинликли кутарганы уьшин алтын медальлер мен савгалав акында» деген буйырыгы бойынша эстеликли алтын медали мен савгаланган.
– Россия МВД-нынъ Краснодардагы университетине туьсип окувыма себебин эткен баьри аьдемлерге де разылык билдиремен. Окув йылларында мага таяв болган кардаш-тувганларыма, тенъ-йолдасларыма эм ювыкларыма басымды иемен. Тербиялавшылар, окытувшылар эм преподавательлер оьз кыйыны эм шыдамлыгы уьшин савболсынлар. Мен оларды баалайман эм сыйлайман, – деген Айза Динисламова окув йылларында оьзине ярдамы тийген аьр бир аьдемге.
Э.Отевалиев.
Суьвретте: Айза Динисламова.