Аьдемнинъ тувган куьни. Бир аьлемет байрам деп саналады сол куьн. Йылдан-йылга бу куьнлер инсанга сулып, акыл аькеледилер. Сонъында, яшавымыздынъ уьйкен кезегин оьткен сонъ, биз артымызга бурылып караймыз. Кайбиримиздинъ яшавга шыгарылмаган ниетлери де бар, ама сол озган йыллар инсанларга кайдай коьп наьсипли, куванышлы куьнлер савкатлаганына коьп затлар шайыт болады.

Медина Рашид кызы Гапарова – наьсипли, уьстинликли хатынлардынъ бириси. Суьйикли иси, коьплеген йыллар бирге яшаган ян йолдасы, оьзине йолдас, маслагатшы, кыймас болган эки кызы, ялгыз, юрегине кайдай таьтли эм аьсирет увылы эм кашан да, хатыннынъ савлай дуныясынынъ маьнеси – йиенлери. Медина Рашид кызына карасанъ, ойлайсынъ, Кудай бу хатынга баьри ийги затларды да кызганмай берипти – ярасык юзи, соьйлегенде ийги соьзи, оны таныганлар кыскаяклыдынъ танълыгын, оьзденлигин эм аьдемшилигин белгилейдилер.
Медина Сартаева (кыз тукымы) Ногай районынынъ Нариман авылында тувып-оьскен, ерли мектебти битирген. Атасы Рашид Джумали увылы эм анасы Алтын Мустафа кызы ерли совхозда куллык эткенлер, атасын Медина Гапарова агаш бен ислейтаган усталардынъ бириси эди районда деп эскереди, ол Уллы Аталык согысынынъ ветераны болган. Кызалак Дагестан патшалык окытувшылык институтынынъ шет эллер тиллери бойынша факультетине туьскен эм уьстинликли кутарган. Яс специалист сол йыл ок Джанибеков атындагы орта мектебине немец тилининъ окытувшысы болып келген. Мен ойлайман, ян йолдасы Рустам Будайхан увылы Гапаров пан яс окытувшы мектебте ислегенде таныскан болса ярайды, сол мектебте ол да окытувшы болып ислеген, сол йылларда, сонъында да Рустам Мединага коьплеген суьйим ятлав сыдыралар багыслагандыр, сондай оьнери бар экенин баьримиз де, боьтен де биз, шаирлер, ийги этип билемиз.
1983-нши йыл туьзилген аьел буьгуьнлерде районда татым аьеллердинъ бириси деп саналады. Кызы Румия Грозный каласында дизайнер болып ислейди, 10 ясындагы увылын тербиялайды, экинши кызы Заира Москва каласында сатув тармагында менеджер болып куллык этеди, эри Руслан Шомаров пан эки бала тербиялайдылар. Увылы Будайхан Россия МВД Ногай районы бойынша иш ислер боьлигинде оперуполномоченный болып ислейди. Рустам эм Медина Гапаровлар «увылынынъ баласы йиенлерден таьтли болады» деген соьзлерди коьп эситкенлер, буьгуьнлерде сондай шатлыкты оларга келини Саида савкатлаяк, ИншАлла, деп карап турылар. Балалар коьп болсын, азбар саьбийлердинъ куьлкисине толсын деп йорайман мен оларга.
Медина Рашид кызынынъ ис йолы да кызыклы. Ол Джанибеков атындагы мектебте окытувшы болып ислеген йыллар мектебтинъ ямагат яшавында да белсен катнаскан, баслап ерли комсомол организациясынынъ секретари болып сайланган, сонъ Ногай район илми эм халк билимлендируьв куллыкшыларынынъ Профсоюз организациясынынъ председатели болып салынган. Бажарымлы кыскаяклы 2000-2012-нши йыллар Дагестан Республикасы бойынша Россия профсоюзларынынъ бойсынмаслык федерациясынынъ Координационлык советининъ председатели болып ислеген, аьлиги заманда Медина Рашид кызы Ногай район билимлендируьв куллыкшыларынынъ профсоюз организациясынынъ председатели болып куллык этеди. Билимлендируьв профсоюзында ислейтаган йыллары ишинде Медина Гапарова оьзин бажарымлы етекши этип коьрсетти, Профсоюз рескомынынъ Президиумынынъ, 2011-нши йыл Москва каласында озгарылган ортак профсоюз советининъ 6-ншы съездининъ агзасы болып сайланган. 2011-нши йыл Медина Рашид кызы Ногай район Билимлендируьв управлениесининъ етекшисининъ орынбасары болып туьседи, бир неше йыллар Билимлендируьв управлениесинде Билимлендируьв-методикалык орталыгын етекшиледи. Сол йыллардынъ ишинде бажарымлы етекши коьп управление исине янъылыклар косты, район ара билимлендируьв конференциялар озгарды. Ана тилине багысланган коьп шаралар озгарылды Медина Рашид кызы Гапарова ман, солардынъ ишинде – «Ана тили – ногай халкынынъ тарихи, байлыгы эм асабалыгы» регионлар ара тоьгерек столлар. Дагестан Республикасынынъ «Инсанлар капиталы», «Дагестан халкларынынъ тиллери» эм баска проектлери бойынша Медина Гапарова ман коьп куллык этилинди. Билимлендируьв управлениесинде ислеген йылларда Медина Гапарова шет эллер эм ногай тил окытувшылардынъ кураторы болып куллык этеди. Оьз билимин бажарымлы специалист квалификация оьстируьв курсларында арттырады, ол Дагестан Республикасы бойынша методистлер Лигасынынъ агзасы болады, республикасынынъ калаларында озгарылган тематикалык семинарларында катнасады.
– Коллективте сый-абырай казанган кыскаяклы оьз исине мукаят, танъ аьдем деп белгили, ол, аьр бир куллыкшы ман тил тавып, куллыкта уьстинликлерге етисуьв йолларын табады. Кайдай аьллер де болады коллективте, Медина Рашид кызы конфликтли аьллерден шыкпага баьри амалларды да табады, – деп айтады онынъ акында Билимлендируьв управлениесининъ етекшиси Алтын Даут кызы Агаспарова.
Мерекели тувган куьнин Медина Рашид кызы Гапарова, аьели, ювыклары, ис йолдаслары арасында карсы алды. Биз де хатынга баьри ийгиликлер йорап, ден савлык эм аьел наьсиби бир де таьвесилмегенин йораймыз.
Г.Бекмуратова.
Суьвретте: М.Гапарова.