Кайзаманларда да окытувшы кесписи сыйлы эм абырайлы кеспилердинъ бириси деп саналган эм саналады. Оьз исининъ устасы болув уьшин окытувшы куллыгына алал болып, окувшыларына тек билимлерин тувыл, юрегин де, янын да бермеге тийисли.

Сайрат Даут кызы Адиева окытувшылык тармагында 40 йылдан артык аьрекет этеди. Тувган авылы Нариманда оны сыйлайдылар эм билимли филолог, бажарымлы окытувшы деп таныйдылар. 2000-ншы йыллардынъ басында Сайрат Даут кызы Нариман авылынынъ орта мектебин етекшилейтаган эди. Буьгуьнлерде онынъ окувшылары Россиядынъ туьрли муьйислеринде ислейдилер, олар туьрли кеспилерди байырлап, элимиздинъ оьрленуьвине оьз уьлисин косадылар.
Быйылгы кеспи байрамын Сайрат Даут кызы Адиева коьтеринъки коьнъили мен карсы алды, Дагестан Республикасынынъ билимлендируьв министри Я.Бучаев билимли окытувшыды «РФ билимлендируьв тармагынынъ сыйлы куллыкшысы» деген сыйлы аты ман савгалады.
Тийисли сый кайзаманда да оьз баьтирин табады. Биз баьримиз де суьйинемиз, коьплеген йыллардан бери балаларга оьз билимин берип келеяткан, оларды орыс тилине эм адабиатына уьйрететаган эм юрегининъ йылувлыгын савгалайтаган окытувшыдынъ эткен иси белгиленди, маьне берилмей калмады.
Сайрат Даут кызына оьз кутлавларымызды айтамыз, келеекте де уьстинликлер эм яшавында ийгиликлер йораймыз.
Г.Бекмуратова.
Суьвретте: С.Адиева.