Мухаммад-аьжи Мурат увылы Атангуловты Ногай районынынъ дин ямагаты аьруьв таныйды. Ол бир неше йыллар узагында Терекли-Мектеб авылдынъ имам Янмурза атындагы межигитининъ имамы, сонъында Ногай район имамлар советининъ председатели болып куллык эткен. Дагестан Муфтиятынынъ тапшырувы ман былтыр ол Махачкаладагы орталык юма межигитининъ имамынынъ орынбасары болып беркитилген эди.

Янъыларда республика орталыгыннан Ногай шоьллигине ийги хабар келди. Регион Муфтиятынынъ кезекли тапшырувы ман яс ердесимиз республикадынъ бас каласынынъ орталык юма межигитининъ имамы этилинген. Буьгуьнлерде Мухаммад-аьжи Атангулов Махачкаладынъэнъ уьйкен межигитинде юма намазларды кылувды юритип баслаган. Бу межигит Дагестанда энъ уьйкен дин ошакларынынъ бириси болады.

Соны ман бирге Дагестан Муфтияты тагы бир яс авылдасымыз Али Залимхан увылы Арслановты Ногай районынынъ имамлар советининъ председатели этип беркиткен.
Эки авылдасымызды да сондай бийик тапшырмалары ман кутлаймыз, оларга берк ден савлыкты, узак оьмирди эм коьп яхшылыкларды йораймыз.
З.Арсланов, Дагестан Муфтиятынынъ Ногай район бойынша билимлендируьв боьлигининъ етекшиси.