Ис борышлары айлак яваплылардан болмаса да, олардынъ этетаган коьмеклери маьнели болады. Кайсы ис орын да ярасык болып коьринеди, эгер сол орындагы аьдем аьрекетин ийги бардырса.
Ийги такпаклардынъ бирисинде айтылгандай болып, «Ис орын аьдемди ярасыкламайды, аьдем ис орынды ярасыклайды» дегенлей, Ногай орталык больницасынынъ операционный блогында он уьш йылдан бери белсенли аьрекетин бардыратаган Кабират Исмаил кызы Джамалова акында айтпага болады.
Кабират Джамалова – буьгуьнлерде сулыплы куллыкшылардынъ бириси. Ол оьзининъ тувыл экеш, орта медициналык персоналдынъ да ис борышларын бек аьруьв де анълайды. Коронавируслы мараз кенъ яйылган шагында, Ногай орталык больницасынынъ баьри болмаса да, коьбиси боьликлери тек сондай авырувлыларды эмлеген заманларда, Кабират алды сырада сол айтылган «Кызыл зонага» кирди эм бу куьнлерге дейим де сонда ислеп юри.
– Оьткен йылдынъ язлык, яз шакларында ислемеге айлак авыр эди. Баьринъиз де туьрли СМИ-лер аркалы болса да, коьргенсиз, уьстимизге кийген, баьри ерлеримизди каплаган кийимлеримизди. Куьнлер де айлак исси эди, кийим де бир неше кабатлы, шыдав да тыныш болмады. Амал йок эди, авырувлылардынъ да эмленуьви бизге бек маьнели эди, оьзимиздинъ де яшав оьмиримиз баалы эди. Кайтип каплансак та, оьзимиз де сол мараздынъ кыйынлыгын сезбей калмадык, бир неше куьнлер авырып яттым, тек бизим медициналык куллыкшыларымыздынъ куьш салувлары ман аяк уьстине турып, аьли де ислеймен.
Сол авыр заманларда ис коллективимиз тыпакласып, аьрекетти бардырдык, бир-биримизге ярдам этип турдык. Меним, сенинъ ис борышынъ сол шакларда йок эди. Биз – киши медициналык персонал болсак та, авырувлылардынъ эт кызувларын тергеп, ингаляторларды салып, кислород беруьвши алатларды тергеп турдык. Ис борышлар айлак коьп эди. Бу куьнлерде исимиз енъилленди. Тыпаклык – авыр маразды енъуьвге де ювыклатады, – дейди Кабират Исмаил кызы бизи мен хабарласувында.
Бу зарарлы мараздынъ хабары шыкканда, районымызда биринши авырувлы аянланганда, сонъ уьйкен агын болып, орталык больницага туьсип баслаганда, тек врачларга тувыл, баьри медицина куллыкшыларына да шийкенуьв тийген эди.
– Баьри зат та эпке келеди, тек баслапкы заманларда балаларымыз уьшин корктык, мен сол «Кызыл зонага» киргенде олар мен уьшин коркып турдылар. «Неге сонда барасынъ, сенинъ ис орынынъ баска ерде ше», – деп те балаларым мага айтып турдылар. Мен болсам, балалардынъ келеектегисин ойладым, биз сол мараздынъ алдын шалувга шыкпасак, ким шыкпага керек деп ойладым, – дейди Кабират соьзди бардыра келип.
Кабират бу куьнлеринде уьш уныктынъ тетеси эм энеси болады. Солардынъ куьезлери ога куьнъирт куьнлерде де саьвле болып, йылувлык берип турады.
Алдымызда хатын-кызлар куьни. Бу байрамды Кабиратка йылы йолыкканды, ден савлыкты йорайман.
Г.Арифуллаева.
Суьвретте: К.Джамалова.
