КЧР-дынъ бас каласы Черкесскте республикадынъ сыйлы окытувшысы, Россия Язувшылар союзынынъ агзасы Насипхан Дауловадынъ «Олар Аталыкты саклаганлар» деген китабининъ презентациясы озды. Онда Карашай-Шеркеш Республикасында атлары белгили болып, яратувшылык аьрекети мен каьрлевши коьп аьдемлер катнастылар: олар – РФ Язувшылар эм Журналистлер союзларынынъ агзалары, илми аьрекетшилери, республикадынъ туьрли баспа шыгармаларынынъ етекшилери, коьлем информациялар амалларынынъ ваькиллери, айтпага, Асхад Карасов, Татьяна Браткова, Юмав Каракаев, Алтынай Атуова, Ахмед Шоров, Солтахан Аджиков, Елизавета Капаева, Роза Боюнсузова эм баскалар.
Шарады Эркин-Юрт авыл маданият уьйининъ етекшиси Майя Кумратова ашты эм юритти. Соьзининъ басында ол йыйылганларга Насипхан Дауловадынъ китаби дуныя ярыгына шыкканы адабиат тарихинде сыйлы орын тутатаганын белгиледи, сол китап пен байланыста туьскен кутлавлар акында айтты.
Насипхан Дауловадынъ яратувшылыгы, язувшылык йолы акында РФ Язувшылар эм Журналистлер союзларынынъ агзасы Татьяна Браткова хабарлады.
Белгилеп озайык, Н.Дауловадынъ «Олар Аталыкты саклаганлар» деген китаби оьткен йылда, Уллы Енъуьвге багысланып, 300 экземпляр тиражы ман Майкоп каласынынъ «Полиграф-Юг» типографиясында баспаланып, дуныя ярыгына шыгарылган.
Китап доьрт боьликлерден туьзилген: «Оьмирликке юрегимизде», «Оьлимсизликке абыт», «Кайтип сизди бек суьемен, Ак Кобаннынъ бойлары» эм «Алгыславлар».
«Оьмирликке юрегимизде» деген боьликте автор бизди Уллы Аталык согысы йылларында тувган элимизди немец-фашист баскыншыларыннан коршалавшылар – Совет Союзынынъ Баьтири Халмурза Кумуков, йырмага ювык ердеслери акында кызыклы документальлик-художестволык очерклери мен таныстырады. Солардынъ ишинде Насипхан-аьейдинъ атасы Азиз Мустафа увылы Даулов акында да очерк бар.
«Оьлимсизликке абыт» деген боьлигине ногай аьлими Юмав Каракаевтинъ, язувшылар Солтахан Аджиковтынъ, Тайбат Кирейтовадынъ, Тамара Дышековадынъ, Иса Капаевтинъ, «Ногай давысы» газетасынынъ бас редакторы Алтынай Атуовадынъ эм онынъ орынбасары Крымхан Добаговадынъ, «Маьметекей» адабиат-суьвретлев журналынынъ яваплы секретари Асият Киреевадынъ эм коьплеген баска аьдемлер акында аьлемет макалалар киргенлер.
«Кайтип сизди бек суьемен, Ак Кобаннынъ бойлары» деген боьлик язувшы Насипхан Дауловадынъ тувган Эркин-Юрт (аьвелгиде Орак) авылына багысланган.
Китаптинъ «Алгыславлар» деп аталган тамамлав боьлигине автордынъ яратувшылык йолында тапкан етимислери акында кыска билдируьвлер киргенлер.
Кыскаша айтканда, Насипхан Даулова авторы болып шыккан «Олар Аталыкты саклаганлар» деген китап басыннан алып сонъына дейим уста калемдасымыз Асият Киреевадынъ енъил колы ман ярасык аьзирленген.
Китап презентациясы шатлыклы аьлде озды. Насипхан Дауловага каратылган коьп алгыслав соьзлер, сагынышлар, йоравлар эситилди шара катнасувшыларыннан. Язувшы Солтахан Аджиков Н.Даулова ман коьптен таныс болып, йылы аьллесетаганын белгилеп, Насипхан Азиз кызына багыслаган ятлавын окыды.
КЧР-дынъ китап баспасынынъ шеркеш боьлигининъ редакторы Ахмед Шоров: «Мен Насипхан Азиз кызы ман зейинли ногай язувшысы Магомед Киримовтынъ Эркин-Юрт авылында озган йолыгыста таныстым, эм соннан бери оьз ара байланысымыз беркип барады. Мен калемдасыма берк ден савлыкты, алдыда тагы да коьп янъы китаплери мен кувандырып барганын сагынаман,» – деди.
Насипхан Дауловады янъы китаби дуныя ярыгын коьруьви мен байланыста баьри шара катнасувшылары да кутладылар, оьз йоравларын айтып эситтирдилер.
Шарадынъ барысында «Ногай давысы» газетасынынъ редакторы Алтынай Атуова «Олар Аталыкты саклаганлар» китабининъ авторы Насипхан Дауловады, китап тысын келбаклаган «Фото-мир» фирмасынынъ суьвретшиси Владимир Болдурчидиди, «Вестник народов Кавказа» газетасынынъ редакторы Султан Нартоковты Сый грамоталар ман савгалады.
Йыравшылар Майя Кумратова, Лиза Кукоева, Лаура Керейтова шарады оьз йырлары ман шынты байрамга айландырдылар.
Сонъында Дауловлар тукымы атыннан шара уйгынлавшыларына эм баьри катнасувшыларга разылык соьзлерин Лидия Хамзатовна Даулова айтты.
А.Найманов.
Суьвретлерде: Н.Даулова; шарадан коьринис.
